QR Aqparat jáne qoǵamdyq damý ministrligi «Jyl volonteri» halyqaralyq syilyǵyn taǵaiyndaý qaǵidalaryn bekitti, dep habarlaidy "Ult aqparat".
Syilyq áleýmettik, qoǵamdyq mindetterdi sheshýge eleýli úles qosqan volonterlerge, volonterler tobyna, volonterlik uiymdarǵa, halyqaralyq volonterlik uiymdarǵa 16 nominatsiia boiynsha beriledi:
1. úzdik volonterlik uiym;
2. korporativtik volonterlik kóshbasshysy;
3. koronovirýstyq infektsiiamen kúreske qatysý;
4. turaqty damý maqsatynyń kóshbasshylary;
5. úzdik áleýmettik kómekshi;
6. tótenshe jaǵdailardy joiýǵa belsendi qatysqany úshin;
7. habar-osharsyz ketken adamdardy izdeýge belsendi qatysqany úshin;
8. quqyq buzýshylyq qurbandaryna kómek kórsetýge belsendi qatysqany úshin;
9. densaýlyq saqtaýdy damytýǵa belsendi qatysqany úshin;
10. salaýatty ómir saltyn nasihattaýǵa belsendi qatysqany úshin;
11. bilimdi áigileýdegi úlesi úshin;
12. qorshaǵan ortany saqtaý jáne qorǵaý úshin qosqan úlesi úshin;
13. beibitshilikti, dostyq pen kelisimdi nyǵaitýǵa qosqan úlesi úshin;
14. tarihi-mádeni muralardy saqtaýǵa jáne damytýǵa qosqan úlesi úshin;
15. janýarlardy qorǵaý máselelerin sheshýge qosqan úlesi úshin;
16. áleýmettik mindetterdi sheshýge qosqan úlesi úshin.
Saiysqa qatysý úshin úmitkerler qajetti qujattardy qazvolunteer.kz biryńǵai onlain-platformasyna elektrondy túrde júkteidi.
Syilyqqa usynylǵan úmitkerler tizimi eki kezeńde qaralady. Birinshi kezeńde qazvolunteer.kz biryńǵai onlain-platformasynda ashyq onlain daýys berý 10 kúntizbelik kún ishinde ótedi.
Ekinshi kezeńge ár nominatsiiadan eń kóp daýys jinaǵan 10 úmitker ótedi. Eger daýystar teń bolsa, eki úmitker de ótedi.
Ár nominatsiiadan eń kóp ball jinaǵan úsh úmitker jeńimpaz bolyp tanylady. Jeńimpazdarǵa diplom jáne estelik músinshe beriledi.
Saiys týraly tolyq aqparat QR Aqparat jáne qoǵamdyq damý ministrliginiń resmi saitynda kórsetilgen.
