Qazaqstanda jyl saiyn qaterli isiktiń 36 myńǵa jýyq jańa jaǵdaiy tirkeledi, dep habarlaidy QazAqparat.
«Qazirgi ýaqytta Qazaqstanda jetekshi onkologiialyq qaýymdastyqtardyń halyqaralyq hattamalaryna sáikes keletin onkologiialyq aýrýlardy emdeýdiń qazirgi zamanǵy túrleri júrgizilýde. Targetti terapiia, immýnoterapiia jáne gendik injeneriia ádisteri belsendi qoldanylady. Barlyq himioterapiialyq jáne targettik preparattar tegin meditsinalyq kómektiń kepildik berilgen kólemi (TMKKK) sheńberinde qamtamasyz etiledi. 2010 jyldan bastap súiek kemigin transplantatsiialaý júrgizilýde. 2012 jyly Qazaqstanda onkopsihologtardyń jeke kásibi qyzmeti paida boldy», - deidi «Qazaq onkologiia jáne radiologiia ǵylymi-zertteý institýty» AQ Basqarma tóraǵasy Diliara Qaidarova.
Onyń aitýynsha, skriningke jyl saiyn shamamen 4 mlrd teńge bólinedi.
«Qazir adamdar meditsinalyq tekserýden qorqady. Sondyqtan aýrýlary asqynyp ketedi. Bizde 5 jylǵa arnalǵan keshendi jospar bar, oǵan 35 mlrd-tan astam teńge bólindi. Qazaqstanda jyl saiyn qaterli isiktiń 36 myńǵa jýyq jańa jaǵdaiy tirkeledi. Búgingi kúni dispanserilik esepte 190 myń adam tur. Jylyna osy qaterli dertten 14 myńanan astam adam qaitys bolady», - deidi bas onkolog.
Sonymen qatar, ol aýrýdy emdeýge barlyq múmkindik bar ekenin atap ótti.
«Mańyzdy jetistik retinde aýrýdyń satysy men taralýyn dál anyqtaýǵa, emdeýdiń ońtaily rejimderin tańdaýǵa, jeke terapiiany qoldanýǵa, sáýlelenýdiń nemese himioterapiianyń ońtaily kýrsyn taǵaiyndaýǵa, emdeýdiń tiimdiligin baqylaýǵa jáne negizsiz operatsiialardy boldyrmaýǵa kómektesetin MRT jáne PET-KT diagnostikasyn, molekýlalyq-genetikalyq zertteýler men telepatologiiany engizýdi aitýǵa bolady. Onkologiialyq aýrýlardyń erte belgilerin anyqtaityn jáne anyqtalǵan aýrýlary bar patsientterge alǵashqy kómek kórsetetin emhanalardyń qyzmetkerleri úlken jumys atqarady. Onkologiialyq aýrýlarmen kúresýdiń Keshendi jospary aiasynda qaterli isiktiń keń taralǵan túrlerimen aýyratyn patsientterge úide palliativtik kómek kórsetý boiynsha mobildi toptardyń jumysy bastaldy», - dedi ol.
