Qazaqstanda buqaralyq aqparat quraldary men teleradio habarlaryn taratý qyzmetkerleriniń «BAQ KASIPODAQ» salalyq kásipodaǵy quryldy, dep habarlaidy "Ult aqparat".
Bul týraly ZOOM platformasynda uiymdastyrylǵan beinekonferentsiiada aityldy. Konferentsiiaǵa qazaq televiziiasynda uzaq jyldar eńbek etken belgili jýrnalister Arman Sqabyluly, Mahat Sadyq, Qymbat Dosjan, Zeiin Álipbek, «Astana TV» telearnasynyń bas direktory Qurmanbek Jumaǵali, «Habar 24» telearnasynyń direktory Olga Tsoi men «Media damytý qory» korporativtik qorynyń bas direktory Evgenii Kochetov, «Aiqyn» gazetiniń bas redaktory Nurmuhammed Baiǵaraev, jýrnalist, «IBalaqai» jobasynyń prodiýseri ári júrgizýshisi Mahabbat Esen jáne ózge de jýrnalister, BAQ salasynyń mediamenedjerleri qatysty.
Jýrnalisterdiń salalyq kásipodaǵy otandyq BAQ salasynyń damýy, tilshiler qaýymynyń qoǵamdaǵy yqpaly men róliniń artýyna, mártebesiniń kóterilýine kúsh salady.
Uiym tóraǵasy retinde jýrnalistikada 30 jyldyq tájiribesi bar, kórermen kózaiymyna ainalǵan belgili telejúrgizýshi Zeiin Álipbek usynylyp, salaǵa jetekshilik etetin boldy.
«Ókinishke qarai, jýrnalist qaýymnyń kásibi jumysy kóbine elenbei, kóleńkede qalyp jatady. Keide, áriptesterimiz qyzmettik mindetin oryndaý kezinde túrli kedergilerge tap bolatynyn da kórip júrmiz. Sondyqtan, jýrnalisterdiń quqyqtyq, áleýmettik mártebesin kóterýge barynsha kúsh salýymyz kerek. Bul máselemen júieli túrde ainalysatyn bizge BAQ qyzmetkerleriniń odaǵyn qurý qajettiligi týyp otyr» - dep atap ótti «Astana TV» telearnasynyń bas direktory Qurmanbek Jumaǵali onlain kezdesýde.
Salalyq kásipodaq basshysy Zeiin Álipbek qurylymnyń jospary men aldaǵy baǵyttary týraly jan-jaqty baiandap berdi.
«Alda jýrnalisterdiń áleýmettik-quqyqtyq jaǵdaiyn jaqsartýdy kózdeitin kóptegen sharýalar, igi bastamalar tur. Ásirese, jýrnalistterdiń sheberligin shyńdap, kásibi ósýine baǵyttalǵan jáne qazaqstandyq BAQ-tyń áleýetin kúsheitýge arnalǵan ilkimdi jobalar bar. Ony tek qana kásipodaq atqarady deýge bolmaidy. Onyń barlyǵyna sizdermen, qurmetti áriptester, birlese otyryp qana qol jetkize alamyz» deidi Zeiin Álipbek.
Konferentsiia barysynda BAQ basshylary men jýrnalister kásipodaqtyń qurylýyn der kezinde qolǵa alynǵan bastama dep baǵalap, júieli jumys istep, tabysty nátijelerge qol jetkizedi degen senimin bildirdi.
Aita ketý kerek, 2020 jylǵy 10 qańtardaǵy jaǵdai boiynsha Qazaqstanda 3669 BAQ tirkelgen. Elde 2964 merzimdi basylym, 161 telearna, 73 radio, 471 aqparat agenttigi jáne jelilik basylym bar.
