2020 jyldyń 7 aiynda Qazaqstanda 272,9 mlrd teńgege 37 066 avtokólik shyǵaryldy, dep habarlaidy "Ult aqparat".
«QazAvtoÓnerkásip» Qazaqstannyń avtomobil salasy kásiporyndary odaǵynyń málimetinshe, 7 aidyń ishinde elimizde jeńil, júk kólikterin, avtobýstardy, arnaiy mashinalar men tirkemelerdi qosa alǵanda jalpy quny 272,9 mlrd teńge bolatyn 37 066 avtokólik qurastyrylǵan. Naqty mánde shyǵarylǵan kólik túrleriniń kólemi ótken jylǵy kórsetkishten 50 paiyzǵa joǵary bolyp otyr.
Esepti kezeńde elimizde 32 128 jeńil kólik qurastyrylyp, ósim 44,2 paiyzǵa jetti. 873 avtobýs qurastyryldy. Júk kóligin qurastyrý 2,9 esege artyp, 3 484-ke jetti. 152 arnaiy tehnika men 429 tirkeme shyǵaryldy.
Respýblika turǵyndary jergilikti óndiristen shyqqan kólikterdi satyp alýǵa 222,2 mlrd teńge jumsady. Bul bir jyl burynǵy kórsetkishten 41,1 paiyzǵa joǵary. Jyl basynan beri elimizdiń kásiporyndarynda qurastyrylǵan kólikterdiń ishinde Lada (9 663), Hyundai (8 030), Ravon (4 077), KIA (3 695) jáne Chevrolet (939) markalaryna suranys joǵary. Bul qatarǵa JAC (547), UAZ (279) jáne Skoda (209) kólikteri de kirip otyr.
2020 jyldyń qańtar-shildesinde 5 851 avtomobildi jeńildetilgen avtonesie memlekettik baǵdarlamasyna qatysýshylar satyp alǵan.
