Basqarýshy kompaniialardan Arnaiy ekonomikalyq aimaqtar men Indýstriialdy aimaq qatysýshylaryna jer ýchaskelerin usynýdyń jańa mehanizmi engiziledi. Bul týraly búgin májiliste investitsiialar jáne damý ministri Jeńis Qasymbek málimdedi, dep habarlaidy Sputnik Qazaqstan tilshisi.
Búgin májiliste "Arnaiy ekonomikalyq jáne indýstriialyq aimaqtar týraly" zań jobasy qaraldy. Qasymbek zań jobasynda AEA qatysýshylaryna jer ýchaskelerin berý tetigin ózgertý qarastyrylyp otyrǵanyn aitty.
"Basqarýshy kompaniialardan Arnaiy ekonomikalyq aimaqtar men Indýstriialdy aimaq qatysýshylaryna jer ýchaskelerin usynýdyń jańa mehanizmi engiziledi. Búginde qoldanystaǵy zańnama normalaryna sáikes, jer ýchaskesin alý protsesi kúrdeli. Oǵan shamamen 6-9 ai ýaqyt ketedi. Sonyń saldarynan jobalardy iske qosý merzimi sozylady. Investorlar da ýaqyt joǵaltady. Sońynda materialdyq shyǵynǵa ushyraidy" — dedi ol.
Onyń aitýynsha, zań jobasy qatysýshylardyń qysqa merzimde jáne jeńil protsedýralar arqyly jer ýchaskelerin alý tártibin ońtailandyrýǵa baǵyttalǵan.
"Atap aitqanda, arnaiy ekonomikalyq aimaq qurylatyn memleket menshigindegi jer ýchaskeleri, Qazaqstannyń jer zańnamasyna sáikes, basqarýshy kompaniialarǵa qaitarymdy negizde ýaqytsha paidalanýǵa beriledi. Óz kezeginde basqarýshy kompaniialar bul ýchaskelerdi ózderi segmenttep, arnaiy ekonomikalyq aimaq qatysýshylaryna usynady", — dedi Qasymbek.
Zań jobasy aiasynda arnaiy ekonomikalyq aimaqty basqarýshy kompaniialardyń ókilettigi men mártebesi, sondai-aq qajetti normativtik-quqyqtyq aktilerdi ázirleý men bekitýde ókiletti organnyń quzyreti kúsheitilmek.
"Bul shara jer ýchaskelerin jáne basqa da ruqsat qujattaryn alý tártibin jeńildetýge múmkindik beredi. Sondai-aq AEA qatysýshylary men jergilikti atqarýshy organdardyń tikelei bailanysyn joiady", — dedi ministr.
Depýtattar atalǵan zań jobasyn birinshi oqylymda maquldady.
