Qazaqstanda sybailas jemqorlyq qylmysyn jasaǵan adamdy kvazimemlekettik sektor sýbektilerine jumysqa ornalastyrýǵa tyiym salynbaq.
Bul týraly QR Sybailas jemqorlyqqa qarsy is-qimyl agenttigi tóraǵasynyń keńesshisi Anar Jarova aitty, dep habarlaidy QazAqparat.
«Kvazimemlekettik sektorda memlekettiń eleýli aqsha aǵyndary men aktivteri shoǵyrlanǵan, sondyqtan bul jerde sybailas jemqorlyq kórinisteriniń aldyn alý máseleleri Antikordyń jiti nazarynda. Biyldyń basynan beri sybailas jemqorlyq qylmystaryn jasaǵany úshin kvazimemlekettik sektordyń 83 laýazymdy tulǵasy anyqtaldy. Onyń ishinde 51-i ártúrli dárejedegi basshylar (20-sy respýblikalyq, 21-i oblystyq, 10-y qalalyq jáne aýdandyq deńgeidegi). Osy jyldyń qańtar aiynan bastap memlekettiń kez kelgen qatysý úlesi bar kvazimemlekettik sektordyń laýazymdy tulǵalary sybailas jemqorlyq sýbektilerine jatqyzylǵanyn atap ótken jón. Tiisti ózgerister Qylmystyq kodekske engizildi», - dedi A. Jarova onlain brifingide.
Aita keteiik, eger buryn qatysý úlesi 50 paiyz jáne odan joǵary kompaniialar ǵana sybailas jemqorlyq sýbektileri bolsa, qazir onyń aýqymy aitarlyqtai keńeidi. Iaǵni, kompaniiada memlekettiń qatysýynyń 1 paiyzy bolsa da, mundai kompaniialardyń laýazymdy adamdary sybailas jemqorlyq baptary boiynsha jaýapqa tartylatyn bolady.
«Sybailas jemqorlyqqa qarsy is-qimyl týraly» Zańǵa sáikes memlekettiń kez kelgen qatysý úlesi bar kompaniialarda uiymdastyrýshylyq-ókimdik jáne ákimshilik-sharýashylyq fýnktsiialary bar adamdar osyndai laýazymdy adamdardyń qataryna jatady. Jaqynda bul sanatqa biýdjetten jáne Ulttyq qordan qarjylandyrylatyn jobalardy iske asyrýǵa jáne satyp alýǵa jaýapty kvazimemlekettik sektor sýbektilerindegi qurylymdyq bólimshelerdiń basshylary da kirdi.
«Aiyppul, shekteý nemese bas bostandyǵynan aiyrý túrindegi negizgi jazadan basqa, múlki tárkilenip, belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyrý túrindegi qosymsha jaza taǵaiyndalatyn bolady. Kvazimemlekettik sektordaǵy sybailas jemqorlyq úshin jaýapkershilikti kúsheitetin taǵy da birqatar túzetýler qazir Parlamentte qaralýda», - dedi A. Jarova.
Onyń sózine qaraǵanda, Eńbek kodeksine sybailas jemqorlyq qylmys jasaǵan adamdy kvazimemlekettik sektor sýbektilerine jumysqa ornalastyrýǵa tyiym salý bóliginde túzetýler engizý eskerilip otyr. Qoldanystaǵy zańnamaǵa sáikes, mundai shekteý basqarýshylyq fýnktsiialardy oryndaýmen bailanysty laýazymdarǵa túsýge ǵana qatysty.
