Tiisti sheshim Nur-Sultanda ótken salalyq biliktilik sheńberleri men kásibi standarttardy ázirleý boiynsha Biliktilik jónindegi ulttyq keńestiń otyrysy barysynda qabyldandy, dep habarlady QR Eńbek jáne halyqty áleýmettik qorǵaý ministrliginiń baspasóz qyzmeti.
Is-sharaǵa QR premer-ministriniń orynbasary Berdibek Saparbaev, QR Eńbek jáne halyqty áleýmettik qorǵaý ministri Birjan Nurymbetov, «Eńbek resýrstaryn damytý ortalyǵy» AQ prezidenti Tamara Dúisenova, Ulttyq keńeske múshe birqatar ministrliktiń vitse-ministrleri, «Atameken» UKP ókilderi, qoǵamdyq birlestikter men kompaniialar qatysty.
Jiynda sóz alǵan BTS Digital bilim berý ortalyǵynyń basshysy Saiasat Nurbek QR Eńbek jáne halyqty áleýmettik qorǵaý ministrligimen (budan ári - EHÁQM) yntymaqtastyq aiasynda BTS Digital kompaniiasy (Eýraziialyq Resýrstyq Toptyń seriktesi (ERG) «Jańa mamandyqtar atlasy» (ári qarai JMA) jobasyn damytý týraly kózqarasyn tanystyrǵanyn aitty.
«Atlas – aldaǵy 10-15 jylǵa arnalǵan perspektivaly salalar men mamandyqtardyń boljamdy kartasy. Bul bizge qai salalardyń belsendi damitynyn, sol salalarda qandai jańa tehnologiialar, ónimder, basqarý tájiribeleriniń paida bolatynyn jáne jumys berýshiler qandai jańa mamandyqtardy qajet etetinin túsinýge kómektesedi», - dep túsindirdi ol.
BTS Digital basshysynyń aitýynsha, JMA-nyń jasalýy qazirgi tańda Qazaqstanda qoldanbaly sipattaǵy jáne jappai qoldanýǵa bolatyn balamaly ónimniń joqtyǵymen bailanysty. Mamandyq tańdaýǵa kelgende kóptegen azamattar ata-analarynyń tilekterin, ishki nanym-senimderin basshylyqqa alady jáne sýbektivti trendterge súienedi.
«Sondai-aq, ekonomikany adekvatty kadrlyq resýrstarmen qamtýǵa kedergi keltiretin, eńbek resýrstarynyń aǵylýyna jáne jumys kúshiniń bosatylýyna bailanysty jeke adamnyń ómir súrý sapasyna, ekonomikalyq jaǵdaiyna áser etetin birqatar júielik alǵysharttar men qaýip-qaterler bar. Negizgi faktorlardy eki kategoriiaǵa bólip qarastyrýǵa bolady. Birinshisine mamandardy daiyndaýǵa degen talaptardyń sipaty men jyldamdyǵyn ózgertetin obektivti jahandyq terendter kiredi. Máselen, kásipterdi ózgertip, joiatyn, tipti, jańa mamandyqtardyń paida bolýyna alyp keletin tehnologiialyq ózgeristerdiń údemeli jyldamdyǵy, tolassyz tsifrlandyrý siiaqty. Ekinshi kategoriia birinshi sanattan shyqqan faktorlarǵa jaýap bere almaýynan týyndaityn jaǵymsyz saldardy bildiredi. Mysaly, kadrlar qajettiligin boljaý júiesiniń joqtyǵy, biliktilik teńgerimsizdigi, jumys kúshiniń eńbek daǵdylarna jáne klassikalyq bilimniń eńbek naryǵynyń suranysyna sáikes kelmeýi siiaqty», - dedi Nurbek.
JMA jasaý úshin zertteý ádistemesi Halyqaralyq Eńbek Uiymy, Resei Federatsiiasynyń Strategiialyq bastamalary agenttigi jáne Skolkovo Máskeý basqarý mektebiniń (RF) jasaǵan «Tehnologiialyq Forsait quzyreti» (Skills Technology Foresight) ádisi negizinde qurylady.
«Qazaqstanda bul baǵyttaǵy alǵashqy qadamdardy ERG jasady. Ol Halyqaralyq eńbek uiymymen jáne Resei Federatsiiasynyń Prezidenti janyndaǵy Strategiialyq bastamalar agenttigimen birlesip elimizdiń taý-ken óndirisinde jańa mamandyqtardyń atlasyn qurý boiynsha belsendi jumys isteidi. Osy jyldyń qańtar aiynda RF SBA kúshimen Qazaqstanda birinshi bolyp BTS Digital sarapshylar toby oqytyldy. Mamyr aiynda Aqtóbe oblysy Hromtaý qalasyndaǵy Don taý-ken baiytý fabrikasy bazasynda pilottyq forsait-zertteý júrgizildi. Nátijesinde kásiporyndar men salalardyń keipin ózgertetin 45 trend, 7 joǵalyp jáne 13 ózgerip bara jatqan kásip, 26 jańa kásip anyqtaldy. Zertteý nátijeleri taý-ken ónerkásibindegi jańa mamandyqtar Atlasynyń negizin qalaidy», - dedi BTS Digital basshysy.
Jańa mamandyqtar atlasyn ekonomikanyń 9 basym sektorynyń negizinde jasaý usynylady: taý-ken metallýrgiia kesheni, munai-gaz, aýyl sharýashylyǵy, kólik jáne logistika, mashina jasaý, aqparattyq-kommýnikatsiialyq tehnologiialar, energetika, týrizm jáne qurylys. Aita ketý kerek, taý-ken ónerkásibindegi jańa mamandyqtardyń atlasy osy jyldyń jeltoqsan aiynda ERG esebinen ázirlenedi.
«Qalǵan 8 sektordaǵy jańa mamandyqtardyń atlasyn daiyndaý úshin qazirgi ýaqytta QR EHÁQM jáne Dúniejúzilik banktiń birlesken jobasyn iske qosý jumystary júrgizilýde. Sonymen birge, joba aiasynda bul quraldyń keń qol jetimdiligin qamtamasyz etý úshin interaktivti veb-sait pen Qazaqstannyń jańa mamandyqtary atlasynyń mobildi qosymshasyn jasaý josparlap otyr. Budan basqa, tehnologiialyq forsait quzyreti ádistemesin zańnamalyq turǵydan bekitý týraly usynystar jasalady. Sonymen birge, BTS Education Qazaqstandaǵy tehnologiialyq forsait ádistemesiniń jalǵyz tasymaldaýshysy jáne iesi retinde jańa mamandyqtardyń atlasyn jasaý kezinde seriktestik tanytytyp kórsetilgen 9 salanyń barlyǵynda tegin ádistemelik qoldaý kórsetýge daiyn», - dedi Saiasat Nurbek.
Otyrys qorytyndysy boiynsha QR premer-ministriniń orynbasary Eńbek jáne halyqty áleýmettik qorǵaý ministrligine ortalyq memlekettik organdarmen birlesip, 1 qazanǵa deiin Qazaqstannyń jańa mamandyqtary atlasyn damytýdyń Jol kartasyn ázirleýdi, sondai-aq osy úderiske qatysatyn sarapshylarǵa qoiylatyn biliktilik talaptaryn aiqyndaýdy tapsyrdy.
Buryn habarlanǵandai, is-shara aiasynda Berdibek Saparbaevtyń tapsyrmasyna sáikes qurylǵan QR Eńbek jáne halyqty áleýmettik qorǵaý ministrligi Eńbek resýrstaryn damytý ortalyǵy janyndaǵy (budan ári - ERDO) Jobalyq keńestiń tanystyrylymy ótti.
ERDO prezidenti Tamara Dúisenova jańa qurylym Eńbek jáne halyqty áleýmettik qorǵaý ministrligi jumysynyń tórt negizgi baǵyty: ulttyq biliktilik júiesi, nátijeli jumyspen qamtý, ataýly áleýmettik kómek, áleýmettik-eńbek salasyn tsifrlandyrý boiynsha áleýmettik-eńbek salasyn damytý jónindegi jobalardy iske asyratynyn aitty.
«Jobalyq menedjmentti qoldana otyryp jasalǵan dál osy baǵyt barlyq qatysýshylar arasyndaǵy ózara is-qimyldyń naqty júiesin qurýǵa, sondai-aq barlyq baǵyttarda týyndaǵan máselelerdi jedel sheshýge múmkindik beredi», - dedi Dúisenova.
