Qazaqstanda 11 qarasha Energiia únemdeý kúni retinde bekitilýi múmkin. Mundai bastamany QR Investitsiialar jáne damý ministrligi kóterip otyr, dep habarlaidy QazAqparat tilshisi.
«Qazaqstannyń energiiany únemdeý júiesiniń negizi 2012-2015 jyldary qurylǵan bolatyn. Degenmen, buǵan deiin bul baǵytta jumystar júrgizilmedi degendi bildirmeidi. Alaida, energiiany únemdeý baǵytyndaǵy qarymdy qadamdar naqty osy kezeńde jasalǵan bolatyn», - dedi QR IDM Indýstriialyq damý jáne ónerkásiptik qaýipsizdik komiteti tóraǵasynyń orynbasary Timýr Nurashev Astanada ótip jatqan forýmda.
Onyń aitýynsha, Qazaqstanda energiiany únemdeý jáne energiiany tiimdi paidalaný baǵytynda zań qabyldanyp, tolyǵymen normativtik quqyqtyq baza jasalǵan. Sonymen birge, Japoniianyń úlgisimen energiiany únemdeý júiesiniń negizgi elementi - Memlekettik energetikalyq reestr qurylǵan.
«Osy jyldyń ortasynda Investitsiialar jáne damý ministrligi BUU Damý baǵdarlamasymen birge 2500 adamnyń arasynda arnaiy saýalnama júrgizgen bolatyn. Saýalnamanyń qorytyndysy boiynsha anyqtalǵanyndai, azamattardyń 23 paiyzynyń ǵana energiia únemdeý týraly túsinikteri bar bolyp shyqty. Osyǵan bailanysty Búkilálemdik bank jáne «DENA» nemis energetikalyq agenttigimen birlese otyryp, «Energiiasy tiimdi Qazaqstan» aqparattyq bastamasyn bastap kettik. Sonymen birge, osy salany damytý aiasynda elimizdiń 12 iri qalasynda «Birge jarqynbyz» festivalin ótkizdik», - deidi ol.
Timýr Nurashev atap ótkendei, qazaqstandyqtardyń arasynda energiiany únemdeý tiimdiliginiń paidasyn keńirek nasihattaý úshin taǵy da aitýly qadamdar jasalatyn bolady.
«Kelesi jyldan bastap energiia únemdeýdi nasihattaý úshin keshendi baǵdarlamany iske qosqaly otyrmyz. Sonymen birge, Halyqaralyq energiia únemdeý kúnine (11 qarasha) Qazaqstanda kásibi mereke mártebesin berýdi kózdep otyrmyz. Bul úshin 11 qarashany Qazaqstan Respýblikasyndaǵy mereke kúnderi tizimine engizý bastamasyn kóterdik», - dedi Timýr Nurashev.
Eske sala ketsek, Halyqaralyq energiia únemdeý kúnine orai Astanada alǵashqy halyqaralyq forým ótip jatyr.
