"Báiterek" holdingi ekinshi deńgeili bankterdiń naryqtyq ipotekasy boiynsha halyq úshin syiaqy mólsherlemesin sýbsidiialaý baǵdarlamasyn iske qosýdy usyndy, - dep habarlaidy Tengrinews.kz.
Bul týraly ulttyq basqarýshy holding basshysy Úkimet otyrysynda málimdedi. Onyń aitýynsha, zeinetaqy jinaqtarynyń eń tómengi jetkilikti sheginiń ósý jáne "7-20-25" baǵdarlamasynyń aiaqtalýyna bailanysty kelesi jyly 500 milliard teńge nemese 35 myń páter mólsherinde ipotekaǵa suranys qanaǵattandyrylmaidy degen boljam bar.
Qanaǵattandyrylmaǵan suranysty jabý úshin ekinshi deńgeili bankterdiń naryqtyq ipotekasy boiynsha halyq úshin syiaqy mólsherlemesin sýbsidiialaý tetigin iske qosý usynylady.
"Qazaqstan qarjygerler qaýymdastyǵymen kelissóz qorytyndysy boiynsha mynadai negizgi sharttar usynyldy:
- alǵashqy jarna - 20 paiyzdan bastap;
- nesieleý merzimi - 20 jyl;
- qaryz somasy - 35 million teńgege deiin;
- tólem qabiletin rastaý mindetti.
Sýbsidiialaýǵa Ulttyq banktiń bazalyq mólsherlemesi 5 paiyzdan aspaityn ipotekalyq nesieniń 7 paiyzdyq mólsherlemesi qoldanylady", - dep qosty "Báiterek" basshysy.
Ol ekinshi deńgeili bankter Qazaqstan turǵyn úi kompaniiasynyń kepildigimen bastapqy turǵyn úi salýshylar men salynyp jatqan turǵyn úilerge óz qarajaty esebinen nesie bere alatynyn túsindirdi.
"Mehanizmdi iske qosý úshin zańnamalyq ózgerister talap etilmeidi. Qazirgi ýaqytta biýdjettik ótinim Qarjy ministrliginde qaralyp jatyr. Biýdjet bekitilgennen keiin "Qazaqstandyq turǵyn úi kompaniiasy" bul baǵdarlamany dereý iske qosýǵa daiyn", - dep túiindedi ol.
