Parlament májilisiniń depýtattary Soltústik investitsiialyq banktiń Qazaqstandaǵy qyzmetin retteitin kelisimdi ratifikatsiialady, dep habarlaidy Sputnik Qazaqstan.
Ulttyq ekonomika ministri Rýslan Dálenovtyń aitýynsha, Soltústik investitsiialyq bank 1975 jyly qurylǵan. Oǵan Skandinaviia jáne Baltyq elderi kiredi. Shtab páteri Helsinki qalasynda ornalasqan. Banktiń jarǵylyq kapitaly 6 milliard 142 million eýrony quraidy. Osy kapital - oǵan múshe memleketterdiń aqshasy. Olardyń ishinde Latviia, Litva, Daniia, Estoniia, Islandiia, Norvegiia jáne Shvetsiia bar. Al banktiń Qazaqstanǵa kelýi energetika, jasyl ekonomika, ónerkásip salalary, kólik, telekommýnikatsiialar, aýyl sharýashalyǵy, densaýlyq saqtaý, shaǵyn jáne orta biznesti qarjylandyrýǵa múmkindik beredi.
"Kelisim múshelik jarnalar jáne biýdjetten basqa da tólemderdi talap etpeidi. Kelisimdi ratifikatsiialaý áleýmettik-ekonomikalyq jáne quqyqtyq saldarǵa ákelip soqtyrmaidy", - dedi Dálenov.
Ministr otandyq qarjy naryǵyna kiretin jańa banktiń qaryz berý sharttaryn da aityp berdi. Onyń sózine qaraǵanda, osy bankten memleket kredit alsa, jyldyq mólsherlemesi 2 protsent bolady.
"Al jeke sektor kredit alatyn bolsa, stavka shamamen 7 protsent bolady. Kreditti 25 jylǵa deiin alýǵa múmkindik bar, iaǵni sharttary tartymdy, basqa halyqaralyq uiymdarǵa uqsas. Mysaly, Aziia damý bankinde memlekettik qaryz boiynsha ústemaqy 2,6 protsentti quraidy. Eýropa qaita qurý jáne damý bankinde 3 protsentke teń. Sosyn Soltústik investitsiialyq bankiniń rásimderi tez ótkiziledi jáne alynǵan qarajatty birqatar salaǵa baǵyttaýǵa bolady", - dedi Dálenov.
Onyń aitýynsha, bankten qaryz alý úshin jeke sektorǵa investitsiialyq mindetteme men kepildik qarastyrylmaǵan.
"Qaryzdy alý kezinde kepildik mindeti joq. Eshbir táýekelge úkimettiń jaýapkershiligi bolmaidy, tek bankke ǵana qatysty", - deidi Dálenov.
Halyqaralyq talaptarǵa sáikes, Soltústik investitsiialyq bank tabys salyǵynan bosatylady. Sonyń arqasynda 762 million teńgeni únemdeidi.
