2020 jyldyń tórtinshi toqsanynda orta eseppen jan basyna shaqqandaǵy nominaldy tabys ońtústik óńirlerde 100 myń teńgege de jetpegen, dep habarlaidy Ranking.kz.
Byltyr tórtinshi toqsanda orta eseppen jan basyna shaqqandaǵy nominaldy tabys 125,4 myń teńgeni qurady. Bul 2019 jyldyń sáikes kezeńimen salystyrǵanda 12,9%-ke kóp.
Naqty mánde, taýar men qyzmet baǵalaryn eskersek, halyqtyń nominaldy aqshalai tabysy 5,2%-ke ósti.
Tórtinshi toqsanda Qazaqstan óńirleri arasynda orta eseppen jan basyna shaqqandaǵy nominaldy tabys Túrkistan oblysynda 65,9 myń teńgeden Atyraý oblysynda 230,2 myń teńgege deiin qubyldy.
Dese de Atyraý oblysynda halyqtyń kirisi naqty mánde 2%-ke tómendegen, al Túrkistan oblysynda, kerisinshe, 7,4%-ke artty.
Tutastai alǵanda, Qazaqstan boiynsha jan basyna shaqqandaǵy eń tómengi nominaldy aqshalai tabys ońtústik óńirlerde tirkelip otyr. Ol jaqta bul kórsetkish 100 myń teńgeden aspaidy.
Máselen Túrkistan oblysynda 65,9 myń teńge bolsa, odan keiin Shymkent (79,1 myń teńge), Jambyl oblysy (86,5 myń teńge), Almaty oblysy (90,7 myń teńge) jáne Qyzylorda oblysy (91,2 myń teńge), dep jazady Ranking.kz.
Al jan basyna shaqqandaǵy eń joǵary nominaldy tabys Atyraý oblysynan basqa, Nur-Sultan (192,9 myń teńge) men Almaty (185 myń teńge) qalalarynda tirkeldi.
Shymkentte orta eseppen jan basyna shaqqandaǵy tabys naqty mánde 3,3%-ke, Batys Qazaqstan oblysynda 5,1%-ke azaidy.
Biyl aqpan aiynda halyqtyń orta eseppen jan basyna shaqqandaǵy nominaldy tabysy 122,4 myń teńgeni qurady. Bul 2020 jyldyń aqpanymen salystyrǵanda 11%-ke, al 2021 jyldyń qańtaryna qaraǵanda nebári 0,1%-ke kóp.
