Búgin Premer-Ministrdiń orynbasary Eraly Toǵjanovtyń tóraǵalyǵymen Qazaqstan aýmaǵynda koronavirýs infektsiiasynyń taralýynyń aldyn alý jónindegi vedomstvoaralyq komissiianyń otyrysy ótti, dep habarlaidy "Ult aqparat" primeminister.kz saityna silteme jasap.
Komissiia jumysyna memlekettik organdardyń, «Atameken» UKP ókilderi jáne óńirlerdiń basshylary qatysty.
Eldegi epidemiologiialyq jaǵdaidyń turaqtanýyn eskere otyryp, vedomstvoaralyq komissiia kelesidei sheshimder qabyldady:
- úi-jailarda mindetti maska taǵý talabyn alyp tastaý;
- meditsinalyq mekemelerde (personal, qyzmetkerler, patsientter, kelýshiler) meditsinalyq maskalardy taǵý mindetin óz kúshinde qaldyrý;
- adam kóp jinalatyn oryndarda, qoǵamdyq kólikte, uiymdasqan ujymdarda maska taǵýdy usynymdyq sipatta qaldyrý;
- bilim berý uiymdarynda oqytýdyń kabinettik júiesine ruqsat berý.
Sondai-aq komissiia sheshimimen «Pfizer» preparatymen vaktsinalaýǵa jatatyn tulǵalar kontingenti keńeitiledi, ol mynadai sanattarmen tolyqtyrylady:
- bastapqy vaktsinalaýdan ótetin, profilaktikalyq vaktsina alǵysy keletin adamdar;
- túrli sebeptermen shetelge shyǵý úshin qaitalama ekpe alýshylar;
- shetelde alǵan vaktsina kýrsyn aiaqtaý úshin ekpe alýshy tulǵalar;
- COVID-19 virýsyna qarsy revaktsinatsiia alýshy barlyq toptaǵy adamdar.
Otyrys sońynda Toǵjanov qolaily epidemiologiialyq jaǵdaidy qamtamasyz etýdiń basty sharttarynyń biri azamattardy ýaqytyly immýndaý jáne revaktsinalaý ekenin atap ótti. Ol ákimdikterge koronavirýs infektsiiasyna qarsy egý naýqanyn erekshe baqylaýǵa alýdy tapsyrdy jáne halyq arasynda sapaly túsindirý jumystaryn júrgizý qajettigin atap ótti.
