QR Eńbek jáne xalyqty áleýmettik qorǵaý vitse-ministri Svetlana Jaqypova zeinetaqydan bas tartý oqiǵasy týraly aityp berdi, dep xabarlaidy QazAqparat tilshisi.
«Men ministrlikke kelgeli beri bir ret qana ondai jaǵdaiǵa tap boldym. Qazaq eline belgili azamat, tulǵa deýge bolady, zeinetaqydan bas tartty. Ol kisi 20 jyl boiy zeinetaqyǵa ótinish bermei júrdi. «Memleketime raqmet, bárine shúkir-táýba, osy ýaqytqa deiin jiyp-tergenim ózime jetedi» deidi. Ol elshi bolyp jumys istegen», - dedi S.Jaqypova Úkimet úiinde ótken baspasóz máslixatynda.
Onyń aitýynsha, ol adam biraz ýaqyt ótinish jazbai júrse de, artynan zeinetaqy alýǵa kelisken.
«Biz onymen sóilestik, bárin túsindirdik. Negizi, zań boiynsha zeinet jasyna kelgen adam quziretti organǵa baryp, ótinish berýi kerek. Ol kisi ótinish bergen joq. Biz onymen jumys júrgizdik. Aityp túsindirgennen keiin ótinishin aldyq. Byltyrdan bastap tólemderdi bere bastadyq», - dedi S.Jaqypova QazAqparat tilshisine bergen suxbatynda.
Aita keteiik, búgingi baspasóz máslixatynda Svetlana Qabykenqyzy zeinetaqy tólemderin aýdarý tártibin túsindirdi.
«Qazir áleýmettik jelilerde qarasam, «kólik pen páter satýdan zeinetaqy jarnasyn ustaidy» dep jazyp jatyr. Olai emes. Ondai tabystan zeinetaqy jarnalary ustalmaidy. Sizder jumys jasaý, ia bolmasa, qyzmet kórsetý arqyly tabys tapsańyz ǵana zeinetaqy jarnasy ustalady. Qazir jumys berýshiler ondai kelisimsharttardy jasaidy da, zeinetaqy jarnalaryn tólemei júredi» , - dedi S.Jaqypova.
