Foto: ashyq derekkóz
Qazaqstannyń Densaýlyq saqtaý ministrligi birjolǵy zeinetaqy tólemderin emdelýge paidalaný erejelerine ózgerister engizý týraly usynystardy talqylaýǵa shyǵardy.
Qujat jobasy 28 tamyz kúni "Ashyq NQA" saitynda jariialandy.
Qujat boiynsha, stomatologiialyq kómek kórsetý kezinde komissiia quramyna stomatolog dáriger kiredi. Ol komissiia otyrysy bastalǵanǵa deiin usynylǵan emdeý josparyn, emdeý aldyndaǵy jáne keiingi rentgen sýretterin, stomatologiialyq uiymnyń meditsinalyq qyzmetke litsenziiasyn zerttep, komissiiaǵa qorytyndy daiyndaidy. Komissiia óz kezeginde stomatologtyń qorytyndysy men usynylǵan qujattardy qarap shyǵyp, 026/ý nysanyndaǵy komissiia qorytyndysyn beredi.
Odan keiin meditsinalyq uiymnyń jaýapty tulǵasy ótinish berýshige komissiianyń qorytyndysyn tabystap, ony komissiia otyrysy ótken kúnnen bastap 2 (eki) jumys kúni ishinde meditsinalyq aqparattyq júiege engizedi.
"Ótinish berýshi nemese onyń zańdy ókili komissiia qorytyndysyn alǵannan keiin tańdalǵan meditsinalyq uiymmen, onyń ishinde sheteldik uiymmen de, meditsinalyq qyzmet kórsetý týraly shart jasasyp, sharttyń nemese tólem shotynyń skanerlengen nusqasyn jáne komissiia qorytyndysyn ýákiletti operatordyń internet-resýrsyndaǵy jeke kabinetke júkteidi.
Ýákiletti operator, eger usynylǵan qujattar birjolǵy zeinetaqy tólemderin maqsatty paidalaný talaptaryna sáikes kelse, qujattardy alǵan kúnnen bastap 5 (bes) jumys kúni ishinde birjolǵy zeinetaqy tólemderin olardyń maqsatty baǵyty boiynsha aýdarady. Stomatologiialyq qyzmet kórsetý kezinde komissiia qorytyndysyn alǵannan keiin jáne emdeý bastalǵanǵa deiin ýákiletti operator emdeý qunynyń 70% mólsherinde avans tóleidi. Qalǵan 30% emdeý aiaqtalǵannan keiin tólenedi", - delingen qujatta.
Birjolǵy zeinetaqy tólemderin emdeýge maqsatty paidalaný qujattary retinde 026/ý nysanyndaǵy komissiia qorytyndysy, meditsinalyq uiym men alýshy arasynda jasalǵan meditsinalyq qyzmet kórsetý sharty nemese dári-dármekterdi satyp alýǵa arnalǵan satýshy men alýshy arasyndaǵy shart qoldanylady.
Qujat jobasy 2024 jylǵy 12 qyrkúiekke deiin qoǵamdyq talqylaýǵa shyǵarylǵan.
