Qazaqstanda 2021 jylǵy 1 qańtardan bastap zeinetaqy mólsheri - 7%, bazalyq zeinetaqy men memlekettik járdemaqy mólsheri 5%-ǵa ulǵaidy, dep habarlaidy "Ult aqparat"
«2021-2023 jyldarǵa arnalǵan respýblikalyq biýdjet týraly» zańǵa sáikes 2021 jylǵy 1 qańtardan bastap jasyna bailanysty jáne eńbek sińirgen jyldary úshin zeinetaqy tólemderiniń mólsheri 7%, iaǵni infliatsiia deńgeiinen 2% ilgerilep arttyryldy. Bul rette jasy boiynsha eń tómengi zeinetaqy mólsheri 43 272 teńgeni qurady.
Bazalyq zeinetaqy tóleminiń mólsheri 5% artty. 2021 jylǵy 1 qańtardan bastap onyń eń tómengi mólsheri 18 524 teńgeni quraidy.
Nátijesinde bazalyq zeinetaqy tólemin eskere otyryp, eń tómengi zeinetaqy mólsheri 1 qańtardan bastap 61 796 teńgeni quraidy.
Bul ósim 2,2 mln zeinetkerge qatysty.
Budan basqa, 2021 jylǵy 1 qańtardan bastap eń tómengi kúnkóris deńgeii shamasynyń ózgerýine bailanysty járdemaqylardyń mynadai túrleri 5% artty:
- múgedektigi boiynsha jáne asyraýshysynan aiyrylý jaǵdaiy boiynsha memlekettik áleýmettik járdemaqylar;
- múgedektigi bar balalardy tárbielep otyrǵan ata-analarǵa, qamqorshylarǵa memlekettik járdemaqy;
- bala kezinen I-shi toptaǵy múgedekke kútim jasaityn otbasylarǵa (adamdarǵa) memlekettik járdemaqy.
Ailyq eseptik kórsetkish mólsheriniń ulǵaiýyna bailanysty 1 qańtardan bastap kelesi járdemaqylardyń mólsheri 5% - ǵa artty:
- №1 jáne №2 tizimder boiynsha memlekettik arnaiy járdemaqylar;
- bala bir jasqa tolǵanǵa deiin onyń kútimine bailanysty memlekettik járdemaqylar;
- bala týǵanda beriletin birjolǵy memlekettik járdemaqy;
- «Altyn alqa», «Kúmis alqa» alqalarymen marapattalǵan nemese buryn «Batyr Ana» ataǵyn alǵan jáne «Ana dańqy» ordenimen marapattalǵan kópbalaly analarǵa arnaiy memlekettik járdemaqylar, memlekettik járdemaqylar;
- birge turatyn tórt jáne odan da kóp kámeletke tolmaǵan balalary, onyń ishinde kámelettik jasqa tolǵannan keiin bilim berý uiymdaryn bitiretin ýaqytqa deiin (biraq jiyrma úsh jasqa tolǵanǵa deiin) orta, tehnikalyq jáne kásiptik, orta bilimnen keiingi, joǵary jáne (nemese) joǵary oqý ornynan keiingi bilim berý uiymdarynda kúndizgi oqý nysany boiynsha oqityn balalary bar kópbalaly otbasylarǵa beriletin memlekettik járdemaqylar;
- Semei iadrolyq synaq poligonyndaǵy iadrolyq synaqtardyń saldarynan zardap shekken azamattarǵa jáne jappai saiasi qýǵyn-súrgin qurbandaryna taǵaiyndalǵan, biraq tólenbegen birjolǵy aqshalai ótemaqylar.
«Mindetti áleýmettik saqtandyrý týraly» zańǵa sáikes MÁSQ-dan eńbek etý qabiletinen airylý jáne asyraýshysynan airylý jaǵdailaryna tólenetin áleýmettik tólemderdiń mólsheri de 5% artty.
