Energetika birinshi vitse-ministri Murat Júrebekov Qazaqstanda kriptovaliýta óndirýshiler jumysy týraly aitty, - dep habarlaidy Tengrinews.kz tilshisi.
"Búginde byltyrǵymen salystyrǵanda, elektr energiiasyn tutyný artqanyn baiqap otyrmyz. Tarihi derekterdi alsaq, keiingi jyldary energiia tutyný kólemi shamamen 1-2 paiyzǵa artqan. Jylyna eń kóbi 2 paiyz. Biraq osy 10 aidyń ishinde normadan joǵary kórsetkishterdi baiqadyq, ol shamamen 8 paiyz boldy. Bul jerde áńgime 1000-1200 megavatt elektr energiiasy týraly bolyp otyr", - dedi OKQ brifinginde energetika birinshi vitse-ministri.
Energetika ministrligi málimetinshe, tutyný kórsetkishiniń artýy kriptovaliýta óndirýmen bailanysty.
"Búginde zańdy túrde tirkelgen 50-ge jýyq kriptovaliýta óndirý ortalyqtary bar. Olar tehnikalyq sharttaryn, parametrlerin alyp, jumys istep jatyr. Olarǵa eshqandai suraǵymyz joq. Biraq "zańsyz", iaǵni zańdy ainalyp ótkisi keletin kóleńkeli sýbektiler bar. Olardyń naryqtaǵy úlesi ai saiyn artyp keledi. Buǵan Qytai biliginiń salany jabýy da yqpal etip otyr. Olardyń kópshiligi bizdiń elge qonys aýdardy. Tiisinshe, olar elektr energiiasy teńgerimine áser etedi", - dep túsindirdi Murat Júrebekov.
