QR Parlamenti Májilisiniń depýtaty Vera Kim memleket volonterlik qyzmetke qandai qoldaý kórsetip otyrǵanyn aitty, dep habarlaidy QazAqparat.
«2019 jyldyń mamyrynda Qostanaida ótken Qazaqstan-Resei jastarynyń forýmynda elimizdiń Prezidenti barlyq volonterlik uiymdardyń bastamasyna qoldaý kórsetti. Shynyn aitsaq, el Prezidenti 2020 jyldy Volonter jyly dep jariialaý týraly bizdiń bastamamyzdy qoldaǵanda tańǵaldyq ári qatty qýandyq», - dedi Májilis depýtaty Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, búginde volonterlik qyzmetti qoldaý jónindegi memlekettik saiasat qarqyndy damý ústinde. Osy maqsatta Aqparat jáne qoǵamdyq damý ministri (AQDM) zańnamany jetildirý jónindegi jumys tobyn qurdy.
«Volonterlik qyzmet jáne qaiyrymdylyq máseleleri jónindegi keibir zańnamalyq aktilerge ózgertýler men tolyqtyrýlar engizý týraly» zań jobasynyń tujyrymdamasy ázirlendi. QR AQDM málimeti boiynsha zań jobasy osy jyldyń kúzinde Parlament Májilisiniń qaraýyna túsedi», - dedi Vera Kim.
Depýtat volonterlikti júieli damytý maqsatynda respýblikalyq volonterlerdiń front-keńsesi jumysy iske qosylǵanyn aitty. Oǵan Ulttyq volonterlik jeli basshylyq jasaidy.
«Óz kezeginde front-keńse volonterlik qyzmettiń alýan túrli baǵyty boiynsha 17 óńirlik keńse qyzmetin úilestiretin biryńǵai ortalyqqa ainaldy. Sonymen qatar volonterlerdiń biryńǵai qazvolunteer.kz onlain-platformasynyń jumysy jandandy. Qazirgi ýaqytta oǵan 47 myńnan astam volonter men túrli 3 myń volonterlik uiym jáne volonterlerdiń kómegine muqtaj bolyp otyrǵan uiymdar tirkelgen»,- dedi ol.
