Qazaqstanda «Úzdik ǵylymi qyzmetker» ataǵymen qosa, 2 myń AEK kóleminde yntalandyrý syiaqysy beriledi, dep habarlaidy "Ult aqparat".
Aita ketsek, ǵylym jónindegi tiisti zań jobasy Parlament Senatynyń birinshi otyrysynda maquldanǵan bolatyn.
«Zań jobasynda birneshe jańalyq qaralǵan. Solardyń ishindegi eń mańyzdysynyń biri – úzdik ǵalymdarǵa «Úzdik ǵylymi qyzmetker» ataǵymen 2 myń AEK kóleminde olardy yntalandyrý kózdelip otyr. Zań jobasyna qoldaý kórsetken Úkimetke alǵys aitamyz. Atalǵan syiaqynyń kólemi 5 mln 834 myń teńgeni quraidy. Bul degenimiz ǵylym salasyna jastardyń qyzyǵýshylyǵyn arttyryp, ol saladaǵy izdeniste júrgen ǵylymi qyzmetkerlerdiń básekelestigin arttyrary sózsiz. Zań jobasyna sáikes, syiaqyny berý erejesin júzege asyrý – ýákiletti organǵa júktelgen», - dedi búgingi Senat otyrysynda depýtat Álimjan Qurtaev.
Al Bilim jáne ǵylym vitse-ministri Sholpan Qarinova syiaqyny berý máselesine toqtaldy.
««Úzdik ǵylymi qyzmetker» - ǵylymi ortadaǵy kópten kútken jańalyq. Bul syiaqy jylyna 50 ǵylymi qyzmetkerge berý qarastyrylǵan. Elimizde búgingi tańda 20 myńǵa jýyq ǵylymi qyzmetker jumys isteidi. Bul syiaqy jas mamandardy yntalandyrady dep kútilýde. Búgingi kúni osy syiaqy boiynsha ǵalymdarǵa qoiylatyn naqty talaptardy aiqyndaý jumystary bastaldy. Birneshe usynys keldi. Bul rette ashyqtyqty qamtamasyz etý máselesi birinshi orynda tur. Ony aiqyndaityn komissiia quramyna belgili qoǵam qairatkerleri, qoǵamdyq uiymdardyń músheleri, táýelsiz baqylaýshylar da kiredi», - dedi ol.
