QR Ulttyq qaýipsizdik komiteti Ishki ister ministrligimen birlesip, «A» jáne «Búrkit» arnaiy bólimshelerin tarta otyryp, astana tóńireginde jurtty qorqytyp, reiderlikpen jáne qarý saýdasymen ainalysqan «Álibekovter», «Ibragimovter» jáne «Mahmýdovtar» uiymdasqan qylmystyq tobynyń asa qaýipti áreketiniń jolyn kesti, dep habarlaidy QR UQK baspasóz qyzmeti.
Nur-Sultan, Almaty, Aqtóbe jáne Qostanai qalalaryndaǵy arnaiy operatsiia sheńberinde atalǵan toptardyń 15 jetekshisi men belsendi músheleri ustaldy, olardyń bireýi Resei Federatsiiasynda banditizm men adam óltirgeni úshin halyqaralyq izdestirýde bolatyn. Atys qarýynyń, oq-dáriler men granatalardyń arsenaly alyndy.
Ustalǵandar Nur-Sultan qalasy Politsiia departamentiniń ýaqytsha ustaý izoliatoryna qamalyp, qolda bar dáleldemelerdi bekitý jáne qylmystyq árekettiń ózge de epizodtaryn anyqtaý boiynsha tergeý is-sharalary júrgizilýde.
Karantindik shekteýler jaǵdaiynda qylmystyq toptar ózderiniń qylmystyq belsendiligin tómendetpei, ekonomikalyq qiyndyqqa tap bolǵan kásipkerlerden qorqytyp alýmen jáne reiderlikpen ainalysýdy jalǵastyrǵan.
Bótenniń múlkin alyp qoiý kezinde olar atys qarýy men dene kúshin qoldaný arqyly dórekilik pen qatygezdik tanytqan.
Osy jaǵdailarda el basshylyǵy quzyretti organdar úshin beibit azamattarǵa bandittik elementter tarapynan qaýip-qaterlerdi joiý, qoǵamnyń 90-jyldardaǵy «reketirlikke» qarai quldyraýyna jol bermeý boiynsha mindetterdi basymdylyqtar qataryna qoiyp otyr.
Arnaýly qyzmetter men politsiianyń qylmystyq toptardyń josparlary men nietterin anyqtaý jáne onyń jolyn kesý boiynsha júieli jumysy jalǵasýda.
