Mektep qabyrǵasynan túlep ushqan túlekterdiń alǵashqy legi búgin Ulttyq biryńǵai testileýden ótip jatyr, dep habarlaidy "Ult aqparat".
Biyl respýblika boiynsha mektep bitirýshilerdiń 70%, iaǵni 102 myńy UBT tapsyrady. Astanada 6 myńǵa jýyq túlektiń 90% testileýden ótedi. Mektep bitirgen 147 myń túlektiń basym bóligi UBT-ny qazaq tilinde tapsyratyny jóninde buǵan deiin aitylǵan bolatyn.
UBT 5 pánnen tapsyrylady: 3 mindetti pán, qalǵan 2-ýi túsetin mamandyǵyna sáikes beiindi pán.
Taǵy bir aita keterligi, «Altyn belgi» iegerleri tek ózgelermen baly birdei bolǵan jaǵdaida ǵana basymdyqqa ie bolady. Osy jyldan bastap túlekterdiń UBT-ny aǵylshyn tilinde tapsyrýǵa erik berildi. Ministrliktiń deregine súiensek, 250 túlek aǵylshyn tilinde tapsyrýǵa ótinish bildirgen.
2018 jylǵa arnalǵan Ulttyq biryńǵai testi suraqtary 50 paiyzǵa jańartylyp otyr. UBT-da jalpy 80 myń suraq bolady.
Biyl Ulttyq biryńǵai testileý 167 ortalyqta, atap aitqanda JOO bazasynda 48, kolledjer arasynda 3, mektepter bazasynda 116 orynda ótkiziledi. Osy jyly sonymen qatar, aýditoriialarǵa uialy bailanys signalyn tunshyqtyratyn jańa qondyrǵylar ornatylǵan. Ol qurylǵy 4G uialy bailanys signalyn da taratpaidy.
Qazaqstandyq mektep bitirýshilerge Ulttyq biryńǵai testileýden ótýge eki ret múmkindik beriledi. Ekeýinde de qajetti ball jinai almaǵan balalar JOO-ǵa shartty túrde qabyldanady.
«Eger mektep bitirýshi UBT-da qajetti baldy jinai almasa, oǵan testti qaita tapsyrýǵa múmkindik beriledi. Alaida, ekinshi nátijemen túlek memlekettik bilim grantyna talasa almaidy, tek aqyly negizde ǵana bilim ala alady. Bul júie baiaǵydan bar. Al eki múmkindikte de testileýden óte almaǵan balalar JOO-ǵa shartty túrde qabyldanady jáne birinshi semestrdiń sońynda keshendi test tapsyrady. Bul joly qajetti upai jinasa, ýniversitettegi bilimin jalǵastyra beredi. Iaǵni, balalardyń joǵary bilim alýy úshin barlyq jaǵdai jasalyp otyr», - dep túsindirdi QR Bilim jáne ǵylym vitse-ministri Ashat Aimaǵambetov.
