«Azamattarǵa arnalǵan úkimet» memlekettik korporatsiiasynyń basshysy Abylaihan Ospanov jańa qyzmettiń iske qosylatyny týraly málimdedi, dep habarlaidy QazAqparat tilshisi.
Onyń sózine qaraǵanda, jaqynda ýaqytsha tirkeýdi SMS-habarlama arqyly uzartý qyzmeti engiziledi. Atalǵan sheshim vedomstvoaralyq komissiianyń kezekti otyrysynda qabyldandy.
«Ýaqytsha tirkeýdiń aiaqtalýyna bir kún qalǵanda tirkeýdi uzartý týraly SMS-habarlama jiberiledi. Adam óz kelisimin berse, ýaqytsha tirkeý uzartylady. Budan bólek, dál sondai habarlama úidiń iesine de jiberiledi. Ol da ýaqytsha tirkeýdi uzartýǵa óz kelisimin berýi kerek. Aqparattyq bazada úi iesiniń menshik quqyǵy rastalǵannan keiin ýaqytsha tirkeý avtomatty túrde uzartylady», - dep jazdy A.Ospanov Facebook jelisindegi jeke paraqshasynda.
Aita keteiik, jańa qyzmetti paidalaný úshin ýaqytsha tirkeýdi uzartatyn adam da, úidiń iesi de mobildi azamattar bazasynda tirkelýi tiis. Al jeke sáikestendirý nómirin mobildi telefonmen bailanystyrýdy Egov portalynyń jeke kabinetinde, ia bolmasa, kez kelgen halyqqa qyzmet kórsetý ortalyǵynda jasap alýǵa bolady.
