Tutynýshylardyń quqyqtaryn qorǵaý komiteti táýelsiz áleýmettik zertteý aiasynda tutynýshylyq quqyqtyń qorǵalý deńgeiin anyqtady, dep habarlaidy "Ult aqparat".
«Qazaqstanda árbir azamat taýardy satyp alý nemese qyzmet alý kezinde qiyndyqtarǵa tap bolady. Sondyqtan tutynýshylardyń quqyqtaryn qorǵaý memleket pen qoǵamnyń mańyzdy mindetine ainaldy. 2020 jyly Tutynýshylardyń quqyqtaryn qorǵaý komiteti táýelsiz áleýmettik zertteý aiasynda tutynýshylyq quqyqtyń qorǵalý deńgeiin anyqtady», - delingen atalǵan komitet baspasóz qyzmeti taratqan aqparatta.
Vedomstvo málimetinshe, táýelsiz zertteýge elimizdiń barlyq óńirinen 17 000 adam qatysty. Saýalnamaǵa sáikes tutynýshylar úshin eń problemaly salalar - meditsinalyq, kóliktik, bilim berý qyzmetteri, bailanys boldy. Respondentterdiń 29 paiyzy óz quqyqtaryn qorǵaý úshin memlekettik organdarǵa, taǵy 29 paiyzy zańgerlerge júginýge daiyn. Suralǵandardyń 24 paiyzy quqyqtaryn óz betinshe qorǵaidy. Al 9 paiyz tutynýshylardyń qoǵamdyq birlestikterine jáne sotqa deiingi retteýdiń basqa sýbektilerine júginýdi qalaidy.
Zertteý qorytyndysy boiynsha komitet memlekettik organdarǵa tutynýshylardyń quqyqtaryn qorǵaýdyń barlyq baǵyttarynda túsindirý jumystaryn kúsheitý boiynsha usynymdar ázirlegen.
«Komitettiń strategiialyq mindeti – azamattyq qoǵamdy tutynýshylardyń quqyqtaryn qorǵaý protsesine neǵurlym belsendi tartýdy qamtamasyz etý. Bul kásipkerlerdi taýarlardyń sapasyn jáne biznesti júrgizý mádenietiniń deńgeiin arttyrýǵa yntalandyratyn bolady ári 2025 jylǵa qarai tutynýshylardyń óz quqyqtaryn qorǵaýmen qanaǵattanýyn 67 paiyzdan 80 paiyzǵa deiin arttyrýǵa múmkindik beredi», - dep atap ótedi vedomstvodan.
