Elimizde turmystyq gaz ballonyn qoldanýdyń jańa mehanizmi ázirlenip jatyr. Bul týraly QR Energetika ministrligi kómirsýtekter jáne jer qoinaýyn paidalaný salalaryndaǵy memlekettik baqylaý departamentiniń direktory Qudaibergen Arymbek málim etti, dep habarlaidy QazAqparat.
«Qazirgi tańda turmystyq gazdy qoldaný júiesin memlekettik baqylaýǵa qatysty reforma qolǵa alynyp jatyr. Jańa reformaǵa sáikes elimizde gaz taratý, qoldaný jáne qaýipsizdikti qamtamasyz etý maqsatynda jospardan tys tekserý quqyǵy qarastyrylmaq. Iaǵni, biz gaz taratý beketterin aralap qyzmetiniń zańdylyǵyn tekseretin bolamyz», - dedi Qudaibergen Arymbek OKQ-de ótken baspasóz máslihatynda.
Onyń aitýynsha, zańbuzýshylyq anyqtalǵan jaǵdaida tiisti shara qoldanylady.
«Sondai-aq, QR Premer-Ministriniń tapsyrmasy bar, oǵan sáikes turmystyq gaz ballonyn qoldanýdyń jańa mehanizmi ázirlenedi. Úkimet basshysynyń atalǵan tapsyrmasyn oryndaýǵa kiristik, onyń merzimi - 2022 jyldyń maýsym aiy», - deidi ol.
