Foto: ashyq derekkóz
Ózbekáli Jánibekov atyndaǵy Ońtústik Qazaqstan pedagogikalyq ýniversitetinde Túrkiianyń bedeldi joǵary oqý oryndarynyń biri – Gazi ýniversitetiniń filialy resmi túrde ashylady, dep habarlaidy Ult.kz.
QR Prezidenti Qasym-Jomart Toqaevtyń Túrkiia Respýblikasyna resmi sapary aiasynda atalǵan kelisim júzege asty.
Túrkiia Respýblikasynyń «Joǵary bilim týraly» zańynyń 39-babyna sáikes Ózbekáli Jánibekov atyndaǵy Ońtústik Qazaqstan pedagogikalyq ýniversitetiniń bazasynda Gazi ýniversitetiniń filialy ashylsyn degen resmi sheshim qabyldandy.
«Qazirgi tańda bizdiń 12 myńnan astam stýdentimiz Túrkiiada, al 300 túrik stýdenti Qazaqstannyń joǵary oqý oryndarynda bilim alyp jatyr. Osyǵan qoldaý kórsetkeni úshin Túrkiia Prezidenti men Úkimetine rizashylyǵymdy bildiremin. Uzaq jyldan beri Túrkistan tórinde Ahmet Iasaýi atyndaǵy Halyqaralyq qazaq-túrik ýniversiteti tabysty jumys istep keledi. Sondai-aq Ońtústik Qazaqstan pedagogikalyq ýniversitetiniń janynan Túrkiianyń ozyq bilim oshaqtarynyń biri – Gazi ýniversitetiniń filialy ashylmaq», – dedi Memleket basshysy Túrkiia saparynda.
Endi Qazaqstan men Túrkiia arasyndaǵy bilim men ǵylym salasyndaǵy strategiialyq áriptestik jańa deńgeige kóterildi. Bul – halyqaralyq bilim keńistigindegi mańyzdy serpilis.
Ó.Jánibekov atyndaǵy OQPÝ – 1937 jyly qurylǵan, elimizdiń ońtústik óńirindegi pedagogikalyq kadrlardy daiarlaityn irgeli oqý orny.
Gazi ýniversiteti – 1926 jyly negizi qalanǵan jetekshi ýniversitetteriniń biri. Ol bilim berý, ǵylym, meditsina jáne ózge de baǵyttar boiynsha joǵary deńgeidegi mamandar daiarlaidy.
