Qazaqstandyqtardyń 70 paiyzy qazaq tilinde sóilei alady dep toqmeiilsýge eshkimniń qaqysy joq. Bul týraly Halyqtyń tabysyn arttyrý baǵdarlamasyn tanystyrǵan QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Qazaq tiliniń memlekettik til ekenine eshkimniń eshqandai kúmáni joq. Búginde ózimizdiń ana tilimizde sóileýge eshqandai kedergi joq. Úkimet otyrystarynyń bári qazaq tilinde júretinin eldiń bári biledi. Sondyqtan ony ary qarai damytý ár qazaqtyń qolyndaǵy, moinyndaǵy paryzy desem, artyq aitqandyq emes dep oilaimyn. Qazir Qazaqstanda turǵyndardyń 70 paiyzy qazaq tilinde sóileidi. Biraq, ony ary qarai damytýymyz kerek. Toqmeiilsip otyrýǵa eshkimniń qaqysy joq. Ásirese, mektep, kolledj, joǵary oqý oryndary deńgeiinde bul máseleni damytýymyz qajet», - dedi Úkimet basshysynyń orynbasary Ortalyq kommýnikatsiialar qyzmetindegi baspasóz máslihatynda BAQ ókilderiniń saýalyna orai.
Onyń dereginshe, elimizdegi mektepterdiń 70 paiyzynan astamy qazaq tilinde sabaq beredi.
«Bul úlken jobalardyń biri. Biraq, bul saiasilandyratyn suraq emes. Til máselesi Mádeniet jáne sport ministrliginen Bilim jáne ǵylym ministrligine berildi. Bilim salasyna berildi degenimiz, til oqytýdyń naqty ádistemesin jetildire otyryp, árbir qazaq balasyna, qazaqtyń sanasyna sińirý kerek. Qazaqstanda turatyn búkil ulttardyń bolashaqta memlekettik tilde sóileýine jaǵdai jasaldy. Biraq, júzege asyrý bárimizdiń moinymyzda», - dedi Eraly Toǵjanov.
