Qazaqstanda qoǵam qairatkerleri, jýrnalister men blogerlerden quralǵan Tsifrlyq komissarlar toby quryldy, dep habarlaidy "Ult aqparat" QR Tsifrlyq damý, innovatsiialar jáne aeroǵarysh ónerkásibi ministrligine silteme jasap.
Arnaiy top «Tsifrlyq Qazaqstan» memlekettik baǵdarlamasynyń oryndalý barysyn qadaǵalaidy. Onyń quramyna Timýr Bektur, Láilá Sultanqyzy, Órken Kenjebek, Mahabbat Esen, Iakov Fedorov, Aigúl Soloveva, Rinat Balǵabaev, Evgenii Kochetov, Renat Tashkinbaev, Oljas Sátiev, Diana Ókiremova, Janna Muhamadi, Erlan Sákenov kirdi.
Tsifrlyq komissarlar táýelsiz baqylaýshy retinde memlekettik organdardyń «Tsifrlyq Qazaqstan» baǵdarlamasy boiynsha iske asyrylyp jatqan jobalary men bastamalaryna qoǵamdyq negizde monitoring júrgizedi. Memleket tarapynan kórsetiletin qyzmetter men HQO jumysy boiynsha qyzmetti alýshy-azamat turǵysynan eskertýler men usynystar beredi.
«Konstrýktivti syn – progrestiń qozǵaýshy kúshi nemese syrt kóz-synshy degendei, ár bildirilgen pikir men usynymdar óz jumysymyzǵa syni kózqaraspen qaraýǵa, nátijelerimizdi jaqsarta túsýge yqpal etedi. Ózderińiz bilesizder, bizdiń ministrlik barlyq memlekettik organdar júzege asyryp jatqan «Tsifrlyq Qazaqstan» memlekettik baǵdarlamasynyń úilestirýshisi. Sondyqtan biz tsifrlandyrý salasynda atqarylyp jatqan jumystardyń naqty nátijeleriniń kórinisin, onyń ishinde eskertýler men usynystardy kórip, bilip otyrǵymyz keledi. Men IT-kompaniialarmen kezdesip turamyn, biraq bizge sol qyzmetterdi alýshylarmen ózara bailanys qajet«, - dedi kezdesýde tsifrlyq komissarlar tobyn qurý týraly bastama kótergen Asqar Jumaǵaliev.
Alǵashqy kezdesýde qatysýshylar eldegi tsifrlandyrý jobalary boiynsha pikirlerimen bólisip, Elektrondyq úkimet portalynyń qyzmetteri men servisterin ońailatý jáne HQKO jumysy boiynsha usynystaryn bildirdi.
Tsifrlyq komissarlarmen kezdesýde »UAT« AQ basshysy Áset Turysov memleket tarapypan kórsetiletin qyzmetterdi alý protsesin túbegeili jeńildetetin Elektrondyq úkimettiń jańartylǵan mobildik qosymshasymen tanystyrdy.
«Kelesi aptada biz Elektrondyq úkimettiń jańartylǵan qosymshasynyń beta-nusqasyn iske qosamyz. Bul barlyq memlekettik qyzmetterdi ońai ári tez alýǵa múmkindik beredi. Osy oraida, bizge sizderdiń pikirlerińiz óte mańyzdy«, - dedi ministr tsifrlyq komissarlarǵa.
Sonymen qatar, kelesi aptanyń sońynda Play Market jáne AppStore-da paida bolatyn eGov mobile jańartylǵan qosymshasynyń beta-nusqasyn testileýge barlyq tilek bildirýshiler qatysa alady. Pikirler men usynystardy press@mdai.gov.kz nemese áleýmettik jelilerdegi eGov resmi akkaýnttaryna jiberýge bolady.
Tsifrlyq komissarlarmen ótken alǵashqy kezdesý sońynda ministr azamattyq ustanymdary úshin alǵysyn bildirip, ózekti máseleler men usynystardy talqylaý úshin osy quramda turaqty túrde kezdesýler ótkiziletinin habarlady.
