Osydan týra 1 jyl buryn 16 naýryz kúni tańǵy saǵat 08:00-de Qazaqstannyń barlyq aýmaǵynda tótenshe jaǵdai rejimi engizilgen edi, dep habarlaidy QazAqparat.
Este bolsa, ótken jyldyń naýryz aiynyń basynda Dúniejúzilik densaýlyq saqtaý uiymy jańa COVID-19 koronavirýsyn pandemiia dep jariialady. Osyǵan orai azamattarymyzdyń ómiri men densaýlyǵyn qorǵaý maqsatynda elimizdiń aýmaǵynda 2020 jylǵy 16 naýryzdaǵy 8 saǵat 00 minýt pen 2020 jylǵy 15 sáýirdegi saǵat 7 saǵat 00 minýt kezeńinde tótenshe jaǵdai merzimi uzartyldy. Tiisti Jarlyqqa QR Prezidenti Qasym-Jomart Toqaev 15 naýryzda qol qoidy. Belgilengen merzim aiaqtalǵannan keiin de koronavirýstyń taralýy tyiylmaǵandyqtan Memleket basshysy taǵy da Jarlyq shyǵaryp, tótenshe jaǵdai qoldanysy 2020 jylǵy 11 mamyrdaǵy 00 saǵat 00 minýtqa deiin uzartyldy.
2020 jyldyń 23 naýryzynda tótenshe jaǵdaidyń engizilýine bailanysty tabysynan aiyrylǵandarǵa 42 myń teńgeden berý týraly sheshim qabyldandy. Ol úshin Memlekettik áleýmettik saqtandyrý qorynan 476 mlrd teńge bólindi. Tólemder 2020 jyldyń sáýir-mamyr jáne shilde ailarynda tótenshe jaǵdai kezinde berildi. Bul kómekti barlyǵy 4,6 mln adam aldy.
Buǵan qosa, QR Tuńǵysh Prezidenti – Elbasy Nursultan Nazarbaevtyń bastamasymen pandemiia jaǵdaiynda halyqtyń áleýmettik osal toptaryna qaiyrymdylyq kómek kórsetý úshin «Birgemiz» qoǵamdyq qory quryldy Qorǵa 2020 jyldyń qazan aiynyń ortasyna qarai somasy shamamen 34 mlrd teńgeni quraǵan qaiyrymdylyq túrindegi aqshalai qarajatty otandyq biznesmender men metsenattar usyndy. Osy qordan 50 myń teńge mólsherinde birjolǵy tólem túrinde qarjylyq kómek 2,2 mln qazaqstandyqqa nemese 650 myńnan astam otbasyǵa berildi. Sondai-aq 320 myń otbasyǵa azyq-túlik sebetteri men birinshi kezekte qajetti taýarlar, taǵy 100 myńyna — 5 mln meditsinalyq maska berildi
Sonymen qatar TJ rejimi men karantindik shekteý sharalarynyń engizilýine bailanysty turaqty ataýly áleýmettik kómek alýshylarǵa ony taǵaiyndaý ýákiletti memlekettik organdarǵa júginbei-aq jyl boiy uzartyldy. Atap aitqanda, 2020 jylǵy IV toqsanda bul shara 130 myń otbasynyń 650 myńnan astam azamatyna qatysty boldy. Sol jyldyń 1 jeltoqsanyndaǵy jaǵdai boiynsha 168,6 myń otbasydan 858 myńnan astam adamǵa 58,3 mlrd teńge somasynda AÁK tólendi.
Koronavirýspen kúreste aldyńǵy shepte júrip qaitys bolǵan meditsina qyzmetkerlerin eske alý maqsatynda Memleket basshysynyń Ókimimen 2020 jylǵy 13 shilde jalpyulttyq aza tutý kúni bolyp belgilendi. Osyǵan bailanysty túngi saǵat 00:00-den bastap elimizdegi barlyq Memlekettik Tý tómen túsirildi. Al Nur-Sultan qalasynyń ýaqytymen saǵat 12:00-de respýblika boiynsha koronavirýs pandemiiasynyń qurbandaryn bir minýt únsizdikpen eske alý jariialandy.
Aqorda rezidentsiiasynyń aldynda Memleket basshysy Qasym-Jomart Toqaev koronavirýs indetinen qaza tapqan azamattardy qurmetpen bir minýt eske aldy.
