Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine birjalyq saýdany damytý jáne jetildirý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasy taýar birjalary qyzmetiniń talaptary men ashyqtyǵyn arttyrýǵa, birjalyq saýdany damytý úshin básekeles orta men jaǵdailar jasaýǵa, sondai-aq birjalyq saýda kólemin ulǵaitýǵa baǵyttalǵan.
Osy qujat 2021 jylǵy 24 qarashada birinshi oqylymda maquldandy.
Jumys tobynyń zań jobasymen jumysy barysynda depýtattar birjalyq taýar uǵymyn naqtylaýǵa, otandyq taýar óndirýshiler bolyp sanalatyn dilerlerdiń birjalyq saýda-sattyqqa kedergisiz qatysýyna baǵyttalǵan túzetýler engizdi. Sondai-aq kómirtegi birlikterin satatyn mamandandyrylǵan birja jeke-dara bólip kórsetildi.
Munymen qosa, taýar birjalarynyń qyzmetine qoiylatyn talaptardy arttyrýdy; birjalyq saýdanyń biryńǵai qaǵidalaryn engizýdi jáne Saýda jáne integratsiia ministrliginiń birjalyq saýda qaǵidalaryn ákimshilendirý jónindegi quzyretin kózdeitin, sondai-aq birjalyq saýda salasyndaǵy naryqtyq qatynastar men básekelestik qaǵidattaryn buzatyn normalardy alyp tastaityn túzetýler engizildi jáne kóterme-taratý ortalyqtarynyń uǵymy men olardyń fýnktsiialary naqtylandy.
Budan basqa, depýtattar derbes derekterdi qorǵaý máseleleri boiynsha «Memlekettik kórsetiletin qyzmetter týraly», «Derbes derekter jáne olardy qorǵaý týraly», «Aqparatqa qol jetkizý týraly», «Aqparattandyrý týraly» Qazaqstan Respýblikasynyń zańdaryna normalar engizdi.
Osyǵan bailanysty zań jobasynyń taqyryby jańa redaktsiiada jazyldy: «Qazaqstan Respýblikasynyń keibir zańnamalyq aktilerine saýda qyzmeti, birjalyq saýdany damytý jáne derbes derekterdi qorǵaý máseleleri boiynsha ózgerister men tolyqtyrýlar engizý týraly».
Parlament Májilisiniń barlyq komiteti zań jobasy boiynsha oń qorytyndylar berdi.
