Batys Qazaqstan oblysynda Qazaqstan aýmaǵynda sintetikalyq esirtkiniń eń iri kólemi (30 keliden astam) tárkilengen is boiynsha sot úkimi shyqty, dep habarlaidy "Ult aqparat".
BQO qylmystyq ister jónindegi mamandandyrylǵan aýdanaralyq sotynda Ýkraina azamattary Igor Dýnaevskii men Vitalii Maliýkqa qatysty sot úkimi jariialandy.
Sot tóraǵasynyń mindet atqarýshy Baqyt Ermahanov málim etkenindei, QR QK 297-baby 4-bóligi (esirtki, psihotroptyq zattardy, sol tektesterdi ótkizý maqsatynda zańsyz daiyndaý, saqtaý, ótkizý jáne qylmystyq toppen asa iri mólsherde psihotroptyq zattardy ótkizý), 264-baby 2-bóligine (transulttyq qylmystyq uiymǵa qatysý) sáikes I.Dýnaevskii 19 jyl, V.Maliýk 18 jylǵa bas bostandyǵynan aiyryldy. Olar jazasyn qaýipsizdigi barynsha joǵary qylmystyq-atqarý júiesi mekemesinde óteidi.
Sot talqysynda málim bolǵanyndai, ótken jyldyń aqpan aiynda Ýkrainada I.Dýnaevskii men V.Maliýk basqa da tergeýmen anyqtalmaǵan adamdarmen birge Qazaqstan aýmaǵynda asa iri mólsherde psihotroptyq zattardy daiyndaý jáne ótkizý maqsatymen transulttyq qylmystyq uiym qurýǵa ýaǵdalasqan.
Sol jyly 23 aqpanda I.Dýnaevskii Minskiden Nur-Sultanǵa ushyp kelgen. 8 naýryzda Oralǵa jetip, uzaq merzimge páter jaldap, V.Maliýkti kútken.
V.Maliýk Varshava, Nur-Sultan qalalary arqyly 13 naýryzda Oralǵa ushyp kelgen. Sodan keiin ekeýi Terekti aýdany Aqsýat aýylynyń shetinen turǵyn úi satyp alyp, jasyryn himiialyq zerthana jasaǵan. Jalpy salmaǵy 30543,06 gramm mefedron men pirovaliron psihotroptyq zattaryn daiyndap, ótkizý maqsatynda saqtaǵan. Bul - Qazaqstanda tárkilengen eń iri sintetikalyq esirtki bolyp tabylady.
Úkim zańdy kúshine engen joq.
Aita keteiik, atalǵan ekeýdi ótken jyldyń tamyz aiynda politsiia qyzmetkerleri ustaǵan bolatyn.
