"Qasietti Qazaqstan" ǵylymi-zertteý ortalyǵynyń basshysy Berik Ábdiǵaliuly jańadan ashylatyn úsh memlekettik qoryqqa qatysty arnaiy qaýlynyń shyqqanyn málimdedi, dep xabarlaidy QazAqparat tilshisi.
"Búgin sizdermen jaqsy xabardy bóliskim kelip otyr. Mádeniet jáne sport ministrliginiń usynysymen arnaiy úsh memlekettik qoryq ashylaiyn dep jatyr. Prezident Ákimshiligi qoldady. Úkimet qaýlysy da shyqty. Bul - Memleket basshysynyń tapsyrmasy. Birinshi qoryq ol - Astananyń mańaiyndaǵy Bozoq. Ony kóbisi bile bermeidi. Biraq Astana bul jerde kezdeisoq salynǵan joq. Ol - qazaq tarixynda eleýli oqiǵalar bolǵan jer. Bozoq sonyń bir dáleli bolsa kerek. Bolashaqta sol jerde úlken mýzei men vizit-ortalyǵy ashylady", - dedi B.Ábdiǵaliuly "Bolashaqqa baǵdar: rýxani jańǵyrý" baǵdarlamasy boiynsha esep berý kezdesýinde.
Onyń aitýynsha, ekinshi qoryq - Botai. Ol jerde adamzat balasy tuńǵysh ret jylqyny qolǵa úiretti. Ony álem ǵalymdary da moiyndap otyr. "Úshinshisi - Saraishyq. Byltyrdan beri Atyraý oblystyq ákimdiginiń bastamasymen úlken jóndeý jumystary atqarylyp jatyr. Kezinde Qasym xandar eldiń astanasyn Ulytaýdan sol jerge aparǵan. Sóitip, Altyn Ordanyń murageri biz ekenin kórsetti. Sondyqtan Saraishyq biz úshin úlken geosaiasi qundylyq. Sony nasixattap, jetkize bilýimiz kerek", - dep atap kórsetti B.Ábdiǵaliuly.
Aita keteiik, shara barysynda QR Prezidenti Ákimshiliginiń ishki saiasat bóliminiń meńgerýshisi Aida Balaeva "Bolashaqqa baǵdar: rýxani jańǵyrý" baǵdarlamasyn iske asyrýda jýrnalisterdiń eńbegin erekshe atap ótti. "Shynynda, baǵdarlamanyń árbir jobasy bólek memlekettik baǵdarlamaǵa sai keledi. Sonyń bárine xalqymyz belsendi atsalysyp keledi. Osy oraida buqaralyq aqparat quraldarynyń ókilderine jeke alǵysymdy bildirgim kelip otyr. Óitkeni syni materialdardyń ózi biz úshin úlken ádistemelik qural siiaqty boldy. Biz óz jumysymyzdy jandandyryp, ony basqa baǵytta durystap jasaýǵa tyrystyq. Árbir jobanyń mazmunyn ashyp, xalyqqa jetkizý jaǵynan ózderińizdiń rólderińiz óte úlken", - dedi A.Balaeva.
