Shet tilder jáne iskerlik karera ýniversiteti bas litsenziiadan aiyrylý aldynda tur. QR BǴM Bilim jáne ǵylym salasyndaǵy sapany qamtamasyz etý komitetiniń qaita tekserý jumystary osyndai nátije kórsetti.
Burynyraq joǵary oqý ornynda profilaktikalyq baqylaý júrgizildi. Nátijesinde, tekserý paraǵynyń 46 tarmaǵynan 39 tarmaǵy boiynsha buzýshylyqtar anyqtaldy. Ýniversitetke sáikessizdikterdi joiý úshin ýaqyt berildi, alaida qaita tekserý jumystary joǵary oqý orny bilim berý qyzmetiniń sapasyn jaqsartý úshin qajetti jumysty júrgizbegenin kórsetti.
«Biz elimizde bilim berý sapasy men kadrlar daiarlaýdy jaqsartý úshin joǵary oqý oryndarynda tekserýler júrgizemiz. Eger ýniversitetter qajetti talaptarǵa sai bolmasa, onda erteń bilimi men biliktiligi tómen, eńbek naryǵyna jumys berýshilerdiń suranystaryna sáikes kelmeitin mamandar shyǵady. Bul rette joǵary oqý oryndaryna buzýshylyqtardy joiýǵa ýaqyt beremiz, alaida olar kemshiliktermen jumys júrgizbeidi. Osyǵan bailanysty keiinirek qatań sharalar qoldanýǵa týra keledi. Ýniversitetterdiń oqý jaǵdailaryn, bilim berý baǵdarlamalaryn jáne tutastai alǵanda, stýdentterdi belgili bir mamandyqtarǵa oqytýǵa degen kózqarasyn jaqsartýy úshin bul óte mańyzdy. Áitpese, joǵary oqý oryndary sapaly bilim emes, tek diplomdar beretin bolady. Mysaly, Shet tilder jáne iskerlik karera ýniversitetinde bilim berý sapasyn qamtamasyz etýdiń ishki júiesi qalyptaspaǵan. Bilim berý baǵdarlamalaryn, jeke oqý josparlaryn taldaý belgili bir pánder boiynsha kreditterdi igerýde úlken aiyrmashylyqtardy kórsetti. Tiisinshe, bilim alýshylar pánderdi tolyq kólemde meńgermeidi. Oqytý nátijeleri boiynsha stýdentterdiń 90%-y shekti deńgeiden óte almady. Oqý protsesinde tipti eń tómengi belgilengen talaptarǵa sáikes kelmeitin eskirgen kompiýterler qoldanylady. Beiindik magistratýra túlegine ǵylymi-pedagogikalyq baǵyttaǵy magistr dárejesin berý boiynsha buzýshylyqtar da anyqtaldy. Memlekettik attestattaý komissiiasynyń sheshimimen bir jyldyq magistratýra túlegine eki jyldyq magistr dárejesi berildi. Bular joǵary oqý ornynda anyqtalǵan buzýshylyqtardyń az ǵana bóligi», – dedi QR BǴM Bilim jáne ǵylym salasyndaǵy sapany qamtamasyz etý komitetiniń basqarma basshysy Elvira Saparbekova.
Anyqtalǵan buzýshylyqtarǵa bailanysty Komitet Shet tilder jáne iskerlik karera ýniversiteti litsenziiasynyń qoldanylýyn toqtatty. Budan ári bas litsenziiadan aiyrý jáne joǵary oqý ornyn jabý boiynsha jumys júrgiziletin bolady.
Zańnamaǵa sáikes litsenziianyń qoldanylýy toqtatyla turǵan jaǵdaida stýdentter ýniversitettiń anyqtalǵan buzýshylyqtardy joiýyn kútpei-aq, basqa joǵary oqý oryndaryna aýysa alady.
Talapkerlerdi oqýǵa túsý úshin joǵary oqý oryndaryn tańdaýda jaýapkershilikpen qaraýǵa shaqyramyz.
