Qazaqstanda keshe, 16 shildede 5658 adamnan koronavirýs tabyldy. Al 15 shildede elde 146 adam koronavirýsqa uqsas pnevmoniiaǵa shaldyqqan. 15-16 shildede koronavirýs pen koronavirýsqa uqsas pnevmoniiadan 57 adam qaitys boldy. Bul týraly densaýlyq saqtaý ministrligi habarlady.
Elde keiingi aptada Covid indetine shaldyqqandar kúrt kóbeiip, virýs juqtyrǵandar sany boiynsha antirekord bolyp jatyr.
Resmi derek boiynsha, elde koronavirýs juqtyrǵandar 483 myńnan, qaitys bolǵandar 4900-den asty.
Al PTR testiniń nátijesi teris, biraq belgileri koronavirýsqa uqsas pnevmoniiaǵa shaldyqqandar 58 myńnan, kóz jumǵandar 3,5 myńnan asyp jyǵyldy. Qazaqstan "pnevmoniiaǵa" shaldyqqandardy byltyr tamyzdan beri eseptep keledi. Oǵan deiin bul dertpen aýyrǵandar jáne qaitys bolǵandar eshqandai statistikaǵa enbei qaldy.
Sarapshylar Qazaqstandaǵy koronavirýs statistikasyna kúdikpen qaraidy. Úkimet koronavirýs juqtyrǵan myńdaǵan naýqasty "ólimine basqa dert sebep boldy" dep statistikaǵa qospady.
17 shildedegi málimet boiynsha 52 895 adam koronavirýs infektsiiasynan (51 266 KVI+ jáne 1 629 KVI-) emdelip jatyr.
Onyń ishinde:
- 16 862 patsient statsionarda
- 36 033 naýqas ambýlatoriialyq deńgeide em qabyldaýda.
KVI+, KVI- shaldyqqandar arasynda:
- 975 adamnyń jaǵdaiy aýyr
- 241 patsienttiń jaǵdaiy óte aýyr
- 123 naýqas ÓJJ apparatynda jatyr.
Elde indet órshigen tusta bilik jurtty ekpe alýǵa shaqyryp jatyr. Úkimet eńbek ujymdaryna vaktsinany mindettegen.
Elde aqpan aiynan beri halyqqa koronavirýsqa qarsy vaktsina salyna bastady. Sodan beri 4 mln 835 myń adam vaktsinanyń keminde bir dozasyn alǵan. 2 mln 731 myń adam vaktsinanyń eki dozasyn alǵan.
Qazaqstan "Spýtnik V" ekpesinen bólek, jergilikti mamandar jasaǵan QazVac, Hayat-Vax (Qytai-BAÁ), Sinopharm vaktsinasyn salyp jatyr.
Osy aptada elde reseilik ekinshi vaktsina "Spýtnik laittyń" ýaqytsha tirkelgeni habarlandy.
