QR Bas prokýratýrasy qylmystyq zańnamany izgilendirýdiń nátijesin jariialady. Sonyń bir baǵyty - túrmede otyrǵandardyń sanyn azaitý, dep xabarlaidy QazAqparat tilshisi.
Bas prokýrordyń orynbasary Marat Axmetjanovtyń aitýynsha, 27 jyldyń ishinde elimizde túrmege qamalǵandardyń sany 68,5 myń adamǵa azaidy. Táýelsizdiktiń alǵashqy jyldary Qazaqstan osy kórsetkish boiynsha álemde úshinshi orynda turdy.
«Ol kezde árbir jetinshi otbasyda sottalǵan bir adam boldy. Degenmen, atalǵan kórsetkish birtindep azaidy. Qazirgi kezde respýblika boiynsha 29 913 adam túrmede otyr», - dedi M.Axmetjanov elordada ótken baspasóz máslixatynda.
Onyń sózine qaraǵanda, osy ýaqytqa deiin 8 túrme jabyldy. Sonyń nátijesinde 12 milliard teńge kóleminde biýdjet qarajaty únemdeldi. Budan bólek, aldaǵy ýaqytta taǵy 4 eski koloniia jabylady.
«Bir jyldyń ishinde túrmede otyrǵan adamdardyń sanyna qatysty xalyqaralyq reitingte Qazaqstan óz pozitsiiasyn 12 satyǵa jaqsartty. Buryn 83 orynda edik, qazir 95-ke tústik. Bul indekste 200 memleket bar. Biz 95-shi orynda turmyz», - dep atap kórsetti M.Axmetjanov.
Resmi málimetke sáikes, zańnamany izgilendirýi sharalary kezinde qylmystardyń sany artqan joq. Statistika boiynsha qylmystyq tártipti buzý oqiǵalary jyl saiyn azaiyp keledi. Byltyr atalǵan kórsetkish 8 protsentke tómendese, biyl úsh aida 6 protsentke qysqardy.
«Osy oraida erekshe atap óter jáit, asa aýyr qylmys jasaǵan qylmyskerlerdiń isteri izgilendirýge jatpaidy. Olardyń ishinde ekstremister, pedofilder, terrorister, uiymdasqan qylmystyq toptyń músheleri, adam óltirgen jáne qaraqshylyq shabýyl jasaǵan qylmyskerler bar. Ondai isterdiń keibir sanattary boiynsha qylmystyq jaýapkershilik kerisinshe kúsheitildi», - deidi M.Axmetjanov.
Aita keteiik, búgingi brifingte Bas prokýrordyń orynbasary áleýmettik jelide taraǵan videoǵa qatysty pikir bildirdi. Belgisiz bireý iri kólemde aqsha jymqyrǵan Bergei Rysqaliev Ulybritaniiada júrgenin túsirip alypty.
Budan bólek, M.Axmetjanov maldy 20 ret urlaǵan barymtashylardyń ustalǵanyn málimdedi.
