5 shildede Qazaqstanda 2618 adamnyń analizinen koronavirýs anyqtaldy. Keiingi aptalarda elde naýqastar úzdiksiz kóbeiip jatyr. Eki kún buryn 3031 naýqas anyqtalyp, koronavirýs boiynsha buryn-sońdy bolmaǵan antirekord tirkelgen.
Ásirese, Nur-Sultan qalasynda indet órship barady. Ótken táýlikte munda 710 adamnyń koronavirýs testi oń shyqqan. Qaraǵandy oblysynda – 490, Almatyda – 277, Batys Qazaqstan oblysynda – 181, Atyraý oblysynda – 154, Aqmola oblysynda – 124, Pavlodar oblysynda – 105, Shymkentte 103 adamǵa koronavirýs juqqan. Eń tómen kórsetkish Soltústik Qazaqstan (30) men Qyzylorda oblystarynda (30) tirkelgen.
Resmi derek boiynsha, 2020 jyldyń naýryzynan beri 439 580 adamnan koronavirýs tabylǵan. 4489-y qaitys bolǵan (4 shilede 20 adam kóz jumǵan). Biraq keibir sarapshylar eldegi bul statistika tómen, shynaiy jaǵdaidy kórsete almaidy dep sanaidy.
Qazir elde Nur-Sultan, Almaty, Shymkent qalalary, Aqmola, Atyraý, BQO, Qaraǵandy, Mańǵystaý jáne Pavlodar oblystary qaýpi kóp "qyzyl aimaqta", Aqtóbe, Qostanai, SQO, Qyzylorda, Almaty, Jambyl oblystary virýs taraýy jaǵynan ortasha "sary aimaqta" tur. Qalǵan oblystar "jasyl aimaqta".
4 shildede elde koronavirýs pnevmoniiasyna 9 adam shaldyqty. PTR nátijesi teris, biraq simptomdary koronavirýsqa uqsas "pnevmoniia" statistikasy byltyr tamyzdan beri júrgizilip keledi. Ministrlik málimetinshe, sodan beri elde 57 437 adam "pnevmoniianyń" sol túrine shaldyqqan. 3467 adam qaitys bolǵan (4 shildede 2 adam kóz jumǵan).
Koronavirýsqa qatysty adam ólimi statistikasyna virýsqa shaldyqqan myńnan asa adam marqum enbei qaldy. Ministrlik qurǵan komissiia olardyń qazasyna basqa dert sebep boldy dep tapqan.
Ministrliktiń dereginshe, 6 shildege deiin 3 mln 843 myń adam koronavirýsqa qarsy ekpeniń bir dozasyn; 2 mln 214 myń adam eki dozasyn da alǵan. Elde reseilik "Spýtnik V", qazaqstandyq QazVac, HayatVax (BAÁ elinde daiyndalǵan Qytaidyń ekpesi), qytailyq Coronavac ekpesin salyp jatyr.
Qazir elde 33 029 adam Covid dertine shalyǵyp, emdelip jatyr. 10 041 adam aýrýhanada jatyr. 633 naýqastyń jaǵdaiy aýyr, 76 adam jasandy tynys apparatyna qosylǵan.
AQSh-taǵy Djons Hopkins ýniversitetiniń esebinshe, álemde 184 106 million adam Covid dertine shaldyqqan. 3 mln 983 myń adam qaitys bolǵan.
