Memlekettik-jekeshelik áriptestik aiasynda aldaǵy jyldary taǵy 15 myń shaqyrym joldy aqyly etý usynyldy. Bul týraly QR Investitsiialar jáne damý ministri Jeńis Qasymbek aitty, dep habarlaidy QazAqparat tilshisi.
Úkimet otyrysynda Jeńis Qasymbek elimizdegi «Jalpy paidalanymdaǵy aqyly avtomobil joldarynda (ýchaskelerinde) aqy tóleý júiesin engizý jáne paidalaný» Memlekettik-jekemenshik áriptestik jobasy týraly baiandady.
«Qazirgi ýaqytta memlekettik-jekeshelik áriptestik mehanizmi boiynsha biz respýblikalyq mańyzy bar avtomobil joldaryn aqyly etý máselesin pysyqtap jatyrmyz. Bul usynysty jeke seriktes bastady. Ol 3 jyl ishinde 15 myń shaqyrym jolǵa aqyly júieni engizý kerektigin usynyp otyr. Bul júie 10 jyl paidalanylady», - dedi ol.
Ministrdiń aitýynsha, 2 sáýirde jobany bastaý týraly habarlama internet-resýrstarda jáne baspasózde jariialanǵan.
«Habarlama shyqqannan keiin 60 kún ishinde áleýetti jetkizýshiler qyzyǵýshylyq bildirip, balamaly usynystar berse, jeke áriptesti tańdaý konkýrs arqyly júzege asyrylady», - dedi ol.
