2020 jyldyń qańtar-mamyrynda elimizde suiyq nemese gazǵa ainalǵan kúide tabiǵi gazdy óndirý kólemi 24,8 mlrd tekshe metrge jetti. Bul ótken jyldyń dál osyndai kezeńinde óndirilgen gaz kóleminen 7,2 paiyzǵa kóp. Aqshaǵa shaqqanda atalǵan kezeńde 141,9 mlrd teńgeniń gazy óndirildi, dep habarlaidy "Ult aqparat" energyprom.kz portalyna silteme jasap.
Óńirlik shekte Atyraý oblysynda óndirilgen tabiǵi gazdyń kólemi joǵary bolyp tur. Bul oblysta 11,2 mlrd tekshe metr gaz óndirilip otyr. Sonymen qatar Batys Qazaqstan oblysynda - 9,1 mlrd, Aqtóbe oblysynda - 2,6 mlrd tekshe metr gaz óndirilgen.
Qazaqstan 2020 jyldyń qańtar-sáýirinde 6,3 mlrd tekshe metr kógildir otynyn eksportqa shyǵardy. Biraq jyldqy mánde eksport kólemi 34,9 paiyzǵa qysqaryp otyr. Qazaqstannyń tabiǵi gazynyń negizgi, naqty aitqanda 566,1 mln dollardy quraityn kólemi Qytai eline eksporttalǵan. Qytaiǵa eksporttyń jyldyq ósimi naqty mánde 7,4 paiyzǵa, al aqshaǵa shaqqanda 2,5 paiyzǵa artty.
Al TMD elderine 101,5 mln dollardyń 2,1 mlrd tekshe metr gazy eksportqa shyǵaryldy. Bul rette Qazaqstan gazynyń negizgi importtaýshysy - Resei. Jalpy TMD elderine eksporttalǵan gazdyń 75,5 paiyzy Reseige eksporttalǵan.
Aita keterligi, QR Energetika ministrliginiń málimetinshe, 2020 jylǵy 3-toqsanda suiytylǵan munai gazyn kóterme saýdada ótkizýdiń baǵalary qosylǵan qun salyǵyn (QQS) esepke almaǵanda 28 000 teńgeni quraidy.
Shekti baǵa 2018 jyldyń I-toqsany - 2020 jyldyń I-toqsany aralyǵynda QQS esebinsiz tonnasyna 38 701,67 teńge deńgeiinde saqtaldy.
