Indýstriia jáne infraqurylymdyq damý ministrligi «Qazaqstan temir joly» ulttyq kompaniiasyna sýsymaly júk tasymalyna Qazaqstan óndirgen konteinerlerdi paidalaný týraly talap qoiyp otyr, dep habarlaidy QazAqparat.
Bul týraly «Qazaqstan temir joly» UK» AQ basqarma tóraǵasynyń orynbasary Oralhan Qulaqov onlain brifingide aitty.
«Qazir eksporttaýshylar úshin eń ózekti másele Qytai naryǵy bolyp tur. Biz úshin ekinshi qiylystyń ashylǵany jaqsy boldy. Sýsymaly júktiń bir bóligi qazir «Altynkól» arqyly ótip jatyr. Bizdiń eksportymyzdyń, Reseidiń tranzit arqyly ótetin eksportynyń keptelisin osy stansa kómegimen seiiltý qolǵa alyndy. Bul stansada Qytai bizdiń eksportty qabyldaý qarqynyn eki ese arttyrdy. Buǵan deiin búkil tasymaldyń tek 1 paiyzy ǵana konteinerge tielip kelgen bolsa, endi onyń úlesin meilinshe arttyrý kerek. Ony búginnen bastaý kerek. Óitkeni bizde Qytai baǵytyna ketetin júktiń 80 paiyzy - sýsymaly júk. Dál osy sýsymaly júkti mýltimodeldi tasymalǵa kóshirýimiz kerek. Sol arqyly biz júkti tolyq kólemde ótkize alamyz», - dedi QTJ ókili.
Onyń aitýyna qaraǵanda, qazir ekijaqty kelissóz arqyly qabyldanyp jatqan sharalardyń bári shekaradaǵy keptelisti ýaqytsha seiiltkenimen, problemany túbegeili sheshe almaýy múmkin.
«Búginde ámbebap dep júrgen jartylai ashyq vagondar qańtarylyp tur. 1 mamyrdaǵy jaǵdai boiynsha Qytai baǵytynda 12 480 vagon turǵan bolsa, maýsym men shilde ailarynda 10 kúndik jappai júk túsirý konventsiiasyn uiymdastyrǵan bolatynbyz. Sonyń kómegimen qoimalar men vagonda turǵan júk kólemin azaittyq. Biraq tapsyrys merzimi buzylǵanyn aityp shaǵymdanýshylar óte kóp. Demek bul máseleni túbegeili sheshpeidi. Sondyqtan konteinermen júk tasymaldaýǵa báribir kóshýimiz kerek. Indýstriia jáne infraqurylymdyq damý ministrligi ol konteinerler Qazaqstanda jasalýy kerek degen talap qoiyp otyr. Konteinerdegi tasymalǵa qanshalyqty tez kóshe alsaq, problema da sonshalyqty jyldam sheshiledi», - dedi Oralhan Qulaqov.
