Beineden alynǵan kadr
Qazaqstan IIM sáýir aiynda ótken “STOP trafik” jedel-profilaktikalyq sharasynyń qorytyndysyn jariialady. Nátijesinde adam saýdasy, jastardy zańsyz áreketterge tartý jáne tyiym salynǵan kontent taratýǵa qatysty ondaǵan qylmys áshkerelendi, dep habarlaidy Polisia.kz.
Resmi málimetke sáikes, adam saýdasyna bailanysty 41 qylmys tirkelgen. Onyń 9-y kámeletke tolmaǵandarǵa qatysty.
Qyzylorda: sábi saýdasy
Qyzylorda oblysynda jańa týǵan náresteni satý deregi anyqtaldy. 25 jastaǵy áiel baladan bas tartqannan keiin, qor jetekshisi deldal retinde áreket etip, sábidi 50 jastaǵy turǵynǵa 1 million teńgege satýdy uiymdastyrǵan. Kúdiktiler qamaýǵa alyndy.
Almaty: baspanasyzdardy qanaý
Almatyda uiymdasqan qylmystyq top baspanasyz adamdardy paidalanyp, olardyń atyna nesie rásimdegen. Keiin bul qarjyǵa avtokólikter satyp alyp, qaita satqan. Uiymdastyrýshylar ustaldy.
Jetisý: jasóspirimderdi quldyqqa salý
Jetisý oblysynda eki jasóspirim urlanyp, eriksiz eńbekke jegilgen. Olardy turmystyq himiia óndirisinde jumys isteýge májbúrlegen. Zardap shekkender qutqarylyp, kúdiktiler ustaldy.
Vebkam jáne zańsyz kontent
Abai oblysynda vebkam-stýdiialar jelisin qurǵan erli-zaiyptylar ustaldy. Olar qyzdardy pornografiialyq túsirilimderge tartqan.
Sonymen qatar el boiynsha jastardy azǵyrýǵa qatysty 20 is, AITV juqtyrý boiynsha 15 is jáne pornografiia taratý boiynsha 5 qylmystyq is qozǵaldy.
IIM málimetinshe, jastardy destrýktivti áreketterge itermeleitin jáne zańsyz kontent taratatyn tulǵalardy anyqtaý jumystary kúsheitilgen.
