Elimiz kórshi Reseiden «Spýtnik Lait» vaktsinasyn ákelýge qatysty aldyn ala kelisim júrgizip jatyr. Bul týraly QR Densaýlyq ministri Aleksei Tsoi málim etti, dep habarlaidy QazAqparat.
«Búginde reseilik áriptesterimizben «Spýtnik Lait» vaktsinasyn jetkizý týraly kelisim júrgizip jatyrmyz. Bul ekpeniń «Spýtnik V»-dan aiyrmashylyǵy joq, tek birinshi komponenti bólek», - dedi Tsoi Úkimet úiinde tilshilerdiń suraǵyna jaýap bere tura.
Ministrdiń aitýynsha, ázirge atalǵan ekpe túrin elimizge jetkizý merzimi belgisiz.
«Sonymen qatar Resei «Spýtnik Lait» vaktsinasyn qansha kólemde usyna alatyny týraly naqtylap jatyrmyz. Sebebi olardyń ishki naryǵynda da suranys bar. Resei jaǵynan kommertsiialyq usynys túse sala, iske kirisetin bolamyz. Bizge vaktsina úlken kólemde qajet emes, óitkeni elimizde revaktsinatsiia júrip jatyr jáne onyń óz kezeńi bar. Jalpy alǵanda jańa jylǵa deiin qaita vaktsina alýshylar úshin ekpe kólemi jetkilikti», - deidi ol.
Sondai-aq, Tsoi Qaraǵandydaǵy farmatsevtikalyq keshenge «Spýtnik Lait» vaktsinasynyń tájiribelik partiiasy jetkizilgenin jáne búginde ony ózimizde óndirý jaǵy qaralyp jatqanyn jetkizdi.
