Elimizde jańa akademiialyq oqý-jattyǵý ortalyǵy paidalanýǵa beriledi. Bul týraly QR Mádeniet jáne sport ministrligi sport jáne dene shynyqtyrý isteri komitetiniń tóraǵasy Samat Erǵaliev málim etti, dep habarlaidy QazAqparat.
«Elimizde sporttyq daiyndyqtyń qoldanystaǵy tájiribesi kórsetip otyrǵandai, sport mektep-internattary men kolledjderiniń túlekteri respýblikalyq jáne halyqaralyq jarystarda jeńimpaz atanyp, memleket tarapynan jan-jaqty qoldaý kórip júr. Al, júldeli oryn almaǵan keibir daryndy sportshylar sporttaǵy mansabyn aiaqtaýǵa májbúr. Osy jaǵdaidy eskere otyryp akademiialyq jattyǵý ortalyǵyn ashýdy jón dep sanadyq. Joǵaryda atalǵan daryndy sportshylar osy akademiianyń bazasynda ózderiniń sport jolyn jalǵastyrý múmkindigine ie bolady», - dedi Samat Erǵaliev ortalyq kommýnikatsiialar qyzmetinde ótken baspasóz máslihatynda.
Ministrlik ókiliniń aitýynsha, akademiiada sportshylar jyl boiy turyp, jetekshi sport mamandarynyń qoldaýymen oqý-jattyǵýyn jalǵastyrady.
«Osylaisha olar shtattyq quramadaǵy sportshylarǵa básekeles bola alady. Aita ketetin jaǵdai, elimizdegi 17 óńirdiń 14-de sport mektep-internaty men kolledjder bar. Oǵan qosa respýblika deńgeiinde 5 sport mektebi jumys istep tur, onyń úsheýi - Almaty qalasynda. Oqý-jattyǵý baǵdarlamalary birdei bolǵandyqtan, zańnamalyq turǵydan bul fýnktsiialar qaitalanady», - deidi ol.
