Qazaqstanda Olimpiada, Paralimpiada jáne Sýrdlimpiada oiyndarynyń, álem chempiondary jeńimpazdary men olardyń jattyqtyrýshylarynyń ómir boiy ai saiynǵy tólem kólemi óspek. Bul týraly Ashyq NQA saitynda jariialanǵan QR Úkimeti qaýlysynyń jobasynda jazylǵan, dep habarlaidy QazAqparat.
«Olimpiada, Paralimpiada jáne Sýrdlimpiada oiyndarynyń chempiondary men júldegerleri jáne (nemese) sporttyń olimpiadalyq túrleri boiynsha álem chempiondary ataqtaryn jeńip alǵan sportshylarǵa, olardy daiyndaǵan jattyqtyrýshylarǵa ómir boiy ai saiynǵy tólem – 100 ailyq eseptik kórsetkish (2021 jyǵy eseppen 291 700 teńge - avtor) mólsherde tólenedi», dep jazylǵan Qaýly jobasynda.
Qazirgi kezde álemdik dodalardyń jeńimpazdary men olardyń jattyqtyrýshylaryna 24,0 ailyq eseptik kórsetkish (2021 jyǵy eseppen 70008 teńge- avtor) kóleminde aqy tólenýde.
Al Mádeniet jáne sport ministrligi atalǵan qaýly jobasyna qatysty pikir bildirdi.
«Qoǵamdyq talqylaýǵa usynyp otyrǵan jobanyń maqsaty – ai saiynǵy materialdyq qamsyzdandyrý tólemderin arttyrý arqyly sportshylar men jattyqtyrýshylardy joǵary sporttyq nátijelerge yntalandyrý, áleýmettik turǵydan qoldaý kórsetý. Atalǵan ózgeristerdi usyný kezinde kóptegen memlekettiń tájiribesi zertteldi. Joǵaryda aitylǵan Reseiden bólek, AQSh, Kanada, Avstriia, Shveitsariia, Ulybritaniia syndy birqatar elderdiń qarjylai qoldaý kórsetý mehanizmi negizge alyndy. Sportshylar men jattyqtyrýshylarǵa ómir boiy jáne ai saiynǵy materialdyq qamsyzdandyrý «Dene shynyqtyrý jáne sport týraly» Zańǵa sáikes, respýblikalyq biýdjetten tólendi», - dedi ministrliktiń baspasóz qyzmeti QazAqparatqa.
Aita ketsek, atalǵan ózgeris 14 qazanda qoǵamdyq talqylaýdan ótken soń respýblikalyq biýdjettik komissiia otyrysynda talqylanady. Ózgeris qoldaý tapsa, materialdyq qamsyzdandyrý 2022 jyly Zań júzinde iske asady.
