Qazirgi tańda bas bostandyǵynan aiyrý oryndarynda 27 myń qazaqstandyq jazasyn óteýde. Onyń 6 myńy ýaqytsha ustaý izoliatorynda jatyr, dep habarlaidy QazAqparat tilshisi QR SIM Qylmystyq-atqarý komitetine silteme jasap.
Agenttiktiń resmi saýalyna berilgen jaýapqa sáikes, sottalǵan jáne tergeýge bailanysty qamalǵan adamdy bir kún asyraý úshin sońǵy málimetter boiynsha 2,4 myń teńge, jylyna 876,9 myń teńge jumsalady.
Eńbekke jaramdylardyń ishinde 72,2 paiyzy jumys isteidi. Olardyń barlyǵy ailyǵyn alyp otyr. Olardyń ortasha ailyǵy shamamen 22-30 myń aralyǵynda. Atqarylǵan jumys eńbek ótiline esepteledi.
Sottalǵandardyń ailyǵy aqshany ýaqytsha saqtaýdyń qorytyndy basqarý esebine (QBE) aýdarylady. Barlyq tólemder men aýdarymdar sottalǵandardyń ótinishi boiynsha QBE-den qolma-qol aqshasyz júrgiziledi. QBE-den bank kartochkasyna ailyq tek qaýipsizdigi minimaldy mekemelerde qamalǵandarǵa ǵana aýdarylyp otyrady.
Barlyq oblystar men túzeý mekemelerinde «Eńbek» RMK filialdary jumys atqarýda. Qamalǵandar jumys kezinde metall óńdeý, aǵash óńdeý, qurylys materialdary, aýyl sharýashylyǵy ónimderi, toqyma buiymdaryn óndirip, kúzet jáne videobaqylaý júiesiniń injenerlik-tehnikalyq saimandaryn montajdaý jáne jóndeý jumystaryn júrgizedi. Sonymen qatar, shaǵyn jáne orta biznestiń sýbekteri tartylady.
Osy jyldyń basynan bastap 251 biznesmen óndiristik alań senimgerlik basqarýyn moinyna alyp, osynyń arqasynda 3 myń sottalǵan adam jumyspen qamtylǵan. Sonymen birge, taǵy 9 biznesmen aǵashtan kádesyi jasaý, etik tigý, ulttyq buiymdardy ázirleý baǵytynda jeke óndirisin jolǵa qoiyp alǵan.
