QR Joǵarǵy Sotynyń resmi ókili Aidos Sádýaqasov sot júiesin qarjylandyrýdaǵy ózgerister týraly aityp berdi, dep habarlaidy QazAqparat.
«Ózderińiz bilesizder, búkil álemde sot júiesi Parlamentke, Úkimetke jáne basqa da organdarǵa táýeldi emes. Al biz sot júiesiniń biýdjetine qatysty qarjylandyrý, materialdyq-tehnikalyq máseleler boiynsha áli kúnge deiin Úkimetke, Qarjy ministrligine jyl saiyn ótinim berip, belgili bir limit deńgeiinde jumys istep kelemiz. Bul árine durys emes. Óitkeni bul «Sýdianyń táýelsizdigi» dep atalatyn konstitýtsiialyq printsipke qaishy keledi», - dedi spiker Ortalyq kommýnikatsiialar qyzmetindegi baspasóz máslihatynda.
Spikerdiń aitýynsha, bul másele Sýdialardyń 8-sezinde kóterilgen jáne ony Q. Toqaev qoldap, Úkimetke tapsyrma berilip, tiisti zań jobasy Parlamentke engizilgen.
«Nátijesinde kelesi jyldan bastap, sot júiesiniń biýdjeti absoliýtti tsifr turǵysynda emes, barlyq memorgandarǵa bólinetin shyǵys qarajatynyń 6,5 paiyzy kóleminde avtomatty túrde bólinetin boldy. Bul sharanyń nátijesinde sot júiesi jergilikti ákimdikterden, Úkimetten, Parlamentten táýelsiz bolyp, sot júiesiniń bedeli men óz múmkindikteri artatyn bolady», - dedi A. Sádýaqasov.
