© Sputnik / Sanat Imangaliev
Qazaqstanda 7 aida 608,8 myń tonna et óndirildi, dep habarlaidy Aýyl sharýashylyǵy ministrligi.
Siyr eti qymbattap, ishki naryqta et tapshylyǵynyń bolý yqtimaldyǵyna qatysty alańdaýshylyq týyp otyr. Alaida dinamika turaqty, deidi ministrlik.
"Shilde aiynyń sońyndaǵy jaǵdai boiynsha iri qara 8,7 mln basqa jetti, onyń 4,5 milliony siyr. Buzaý sany 2,7 mln basqa deiin ósti. Bul óndiris kólemin odan ári arttyrýǵa negiz bolady", - deidi vedomstvo.
Qańtar-shilde ailarynda elde 608,8 myń tonna et óndirilipti. Onyń 205,7 myń tonnasy siyr eti.
Óndirýshilerden iri qara maldyń tiridei salmaqtaǵy kóterme baǵasy 2400–3100 teńge/kg, bólshek saýdada – 3000–3700 teńge/kg aralyǵynda, óńirlerge qarai ózgerip otyrady.
Baǵa nege ósti:
selektsiialyq-asyl tuqymdyq jumysty sýbsidiialaý toqtatyldy,
energiia resýrstary qymbattady,
jem-shóp, janar-jaǵar mai qymbattady,
veterinarlyq preparattar quny artty, AÓK-degi jalaqy kóterildi.
Buǵan qosa jetkizýmen ainalysatyn deldaldardyń áseri bar.
Sonymen qatar qazaqstandyq siyr etine syrtqy naryqtaǵy suranys artyp keledi.
Qańtar–maýsym ailarynda eksport kólemi 16,1 myń tonnany qurap, 2,4 ese ósti.
Negizgi baǵyttar:
Ózbekstan,
Tájikstan,
Qyrǵyzstan,
Qytai,
BAÁ.
Qazirgi tańda bordaqylaý alańdarynyń júktemesi 35–40%. Ony arttyrý maqsatynda 2025 jylǵy 1 tamyzdan bastap jyldyq 5%-ben 12 aiǵa jeńildetilgen kreditteý baǵdarlamasy engizildi. Bul maqsatqa 50 mlrd teńge bólindi.
Baǵdarlama jas maldy, jem-shópti, JJM men jabdyqty satyp alýdy qarjylandyrady jáne bordaqylaý alańdarynyń júktemesin 60%-ǵa jáne odan joǵary deńgeige jetkizýge múmkindik beredi.
