Foto: elements.envato.com
Qandastar 10 jylǵa jeńildetilgen viza alyp, Qazaqstanda óz biznesin júrgize alady. Bul týraly Úkimet otyrysynda eńbek jáne halyqty áleýmettik qorǵaý ministri Tamara Dúisenova aitty, - dep habarlaidy Tengrinews.kz agenttigi.
Tamara Dúisenova Úkimet otyrysynda Memleket basshysynyń tapsyrmasy boiynsha ázirlengen jáne Ekonomikalyq reformalar jónindegi joǵary keńeste maquldanǵan 2023-2027 jyldarǵa arnalǵan "Ashyq Qazaqstan 500+" kóshi-qon saiasatynyń tujyrymdamasyn usyndy.
"Birinshi baǵyt - bilim berý immigratsiiasy, onyń maqsaty Qazaqstandy óńirlik bilim berý haby retinde aiqyndaý bolyp tabylady. Professor-oqytýshylar quramyn kúsheitý jáne bilim berý sapasyn arttyrý úshin Qazaqstanǵa suranysqa ie mamandyqtar boiynsha 100 úzdik oqytýshy men suranysqa ie tehnologiialar boiynsha ǵalymdardy tartý usynylady.
Turýǵa yqtiiarhat alý quqyǵymen on jyldyq "Ǵylymi-pedagogikalyq viza" berýdiń ońailatylǵan tártibin jáne keiinnen Qazaqstan azamattyǵyn engizý kózdeledi. Osyndai múmkindikterdi tapshy mamandyqtar boiynsha oqityn sheteldik stýdentter arasynan magistranttar men bakalavrlar úshin taratý usynylady", - dedi ministr.
Ekinshi baǵyt - biznes-immigratsiia. Memleket basshysynyń tapsyrmasy boiynsha jáne EYDU elderiniń tájiribesine súiene otyryp, investitsiialyq viza berýdiń shegin 300 myń AQSh dollaryna deiin tómendetý usynylady. Migranttardyń osy sanaty úshin turýǵa yqtiiarhaty bar jáne biznesti tirkeý, menshikke ielik etý, personaldy jaldaý, qarjylyq tólemder júrgizý jáne olardyń kásipkerlik qyzmetinen týyndaityn kez kelgen operatsiialardy erkin júzege asyrý quqyǵy bar "Investorlyq vizany" engizý kózdeledi.
Úshinshi baǵyt sheńberinde elimizge jii tartylatyn jáne bir mezgilde Qazaqstan úshin tapshy kásipter boiynsha 100 úzdik sheteldik mamandardy tartý usynylady. Olar úshin turýǵa yqtiiarhaty bar "Baǵaly daǵdylar vizasy" engiziledi jáne baǵaly daǵdylardyń (tapshy kásipter men mamandyqtar) únemi jańartylyp otyratyn reitingi qalyptastyrylady.
Bul rette kórshi elderden, onyń ishinde beiresmi arnalar arqyly keletin eńbek migranttarynyń qozǵalysyn esepke alýdy kúsheitý kózdeledi. Eńbek migranttaryn tartý jeke tulǵalardyń naqty qajettiligin eskere otyryp aiqyndalatyn bolady, sondai-aq migranttardyń eńbek qyzmetiniń ornyn qatań baqylaý qamtamasyz etiledi.
"Kelesi baǵyt etnikalyq kóshi-qondy retteýge qatysty. Munda jumys eki negizgi aspekt boiynsha júrgiziledi.
Birinshisi - shetelde turatyn etnikalyq qazaqtardyń áleýetin paidalaný. Osy maqsatta etnikalyq qazaqtarǵa, basqa elderdiń azamattaryna, joǵary deńgeidegi kásipqoilarǵa nemese óz elderinde tabysty biznes-keisterdi iske asyrǵan jáne olardy Qazaqstanda masshtabtaýdy qalaityn "Ata joly" kartasyn engizý usynylady. Olardyń tarihi otanyn damytýǵa qosqan úlesin jyl saiynǵy "Paryz" baiqaýy aiasynda Prezidenttik syilyqpen marapattaýdy usynamyz.
Ekinshisi - elge keletin qandastardyń kóshi-qonyn retteý tetikterin jetildirý. Qandastardy qonystandyrý saiasatyn eldiń demografiialyq jáne ekonomikalyq úrdisterin eskere otyryp, olardy qujattardy qabyldaýdyń bastapqy kezeńinde qonystandyrý óńirlerine qonystandyrýdy qosymsha yntalandyra otyryp, túbegeili reformalaý usynylady", - dep habarlady Tamara Dúisenova.
Besinshi baǵyt - bosqyndarmen jáne baspana izdeýshilermen jumys. Ministrlik ýákiletti memlekettik organdarmen birlesip, BUU standarttarymen ulttyq zańnama normalaryn implementatsiialaý jóninde usynystar ázirleitin bolady.
Altynshy baǵyt - shetelde jumys isteitin Qazaqstan azamattarynyń quqyqtaryn qorǵaýdy qamtamasyz etýdi kózdeidi. Qazaqstandyqtardyń sany jaǵynan eń kóp jumys isteitin elderde qazaqstandyq eńbek migranttarynyń quqyqtaryna kepildik beretin memleketaralyq kelisimder paketin qabyldaý usynylady.
"Kóshi-qon aǵyndarynyń qozǵalysyn esepke alý maqsatynda kóship-qonýshylardyń qozǵalysyn esepke alýdyń biryńǵai aqparattyq júiesin qurý usynylady. Bul memleketke kóshi-qon zańnamasyn buzý faktilerin tiimdi anyqtaýǵa múmkindik beredi, al adamdar úshin memlekettik qyzmetterdi alýdy jeńildetedi, ýaqytty únemdeidi jáne memlekettik organdarmen bailanysty azaitady", - dedi Tamara Dúisenov.
Ministr usynylǵan sharalar kóshi-qon saiasatyn tiimdi "qaita júkteýge" jáne ártúrli salalardy odan ári damytý áleýetimen adami kapital deńgeiin arttyrýǵa múmkindik beretinin atap ótti.
