Qazaqstanda sheteldik tasymaldaýshylar úshin alym mólsherlemesin arttyrý josparlanyp otyr. Bul týraly Májilis depýtaty Sergei Simonov aitty, dep habarlaidy QazAqparat.
Bul qadamdar «Salyq jáne biýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne biýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» zań jobasynda qamtylǵan.
«Zań jobasynda Salyq kodeksinen QQS asyp ketýin qaitarý kezinde qoldanylatyn QQS baqylaý shoty jónindegi normalardy alyp tastaý usynylady», - dedi Simonov Májilistiń jalpy otyrysynda.
Onyń aitýynsha, mundai sheshim Qarjy ministrligi tarapynan júrgizilgen pilottyq joba kezinde qabyldandy.
Sonymen qatar zań jobasynda Qazaqstan Respýblikasynyń aýmaǵy boiynsha halyqaralyq qatynasta jolaýshylar men júkterdi tasymaldaýdy júzege asyratyn sheteldik avtokólik quraldarynyń júrip ótýi úshin sheteldik tasymaldaýshylarǵa arnalǵan alym mólsherlemesin 20-dan 30 AEK-ke deiin arttyrý eskerilgen.
Qujatta temeki ónimi bóligindegi «aktsizdik markalar» terminin «sáikestendirý quraldary» terminine aýystyrý usynylǵan.
Budan buryn habarlanǵandai, jalpy otyrysta «Salyq jáne biýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne biýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» zań jobasy birinshi oqylymda maquldandy.
