Daryndy jastardyń elden ketýin azaitý maqsatynda shetel ýniversitetteriniń filialdaryn ashý josparlanyp otyr. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Bilim salasyn damytý máseleleri óte ózekti ári mańyzdy ekenin bilesizder. Básekege qabiletti adami kapitaldy damytý - «bilim ekonomikasyna» kóshýdiń negizgi faktory. Sondyqtan qoǵamda bilim berýge árqashan erekshe talaptar qoiylyp, úlken nazar aýdarylady. Osyǵan orai, «Nur Otan « partiiasynyń baǵdarlamasyn iske asyrý aiasynda bilim berýdiń mazmunyn jańartý, onyń jańa infraqurylymyn qurý, pedagogtar men oqýshylardy áleýmettik qoldaý boiynsha naqty sharalar ázirlendi», - dedi Úkimet basshysy.
Onyń atap ótýinshe, 2024 jylǵa qarai pedagogtardyń jalaqysy men stýdentterdiń shákirtaqysy 2 ese ósedi. 800 jańa mektep salynyp, 5000 aýyl mektebi jańartylady. Kolledjderde 9 synyptyń negizinde bilim berý tolyǵymen tegin bolady. 10 kolledj bizneske senimgerlik basqarýǵa berildi.
«Bul tájiribeni odan ári jalǵastyrý qajet. Ýniversitetterdiń bilim berý baǵdarlamalary kásibi standarttardyń negizinde 100 paiyz jańartylady. Bul túlekterdiń jumysqa ornalasý múmkindigin arttyrady. Daryndy jastardyń elden ketýin azaitý maqsatynda shetel ýniversitetteriniń filialdaryn ashý josparlanyp otyr. 20 otandyq jetekshi joǵary oqý orny óńirlerdiń ósý nysanasy bolady. Nazarbaev Ýniversitetiniń tájiribesi boiynsha innovatsiialar men jańa tehnologiialardy damytýmen ainalysatyn eki ozyq joǵary oqý orny qurylady», - dedi Asqar Mamin.
