Qazaqstanda shaǵyn jáne orta biznes óndirgen ónim kólemi artyp keledi. Bul týraly búgin Úkimet úiindegi baspasóz máslihatynda QR Ulttyq ekonomika vitse-ministri Jasulan Mádiev aitty, dep habarlaidy QazAqparat.
«Resmi statistkalyq derekterge sáikes 2019 jyldyń qańtar-maýsymynda respýblikanyń jalpy ishki ónimindegi shaǵyn jáne orta biznestiń úlesi 28,5 paiyzdy qurady. Bizdiń mindetimiz - bul kórsetkishti 2025 jyly 30 jáne 2050 jyly 50 paiyzǵa jetkizý. Bul damyǵan elderdiń deńgeiine sai keledi», - dedi ol.
Osy oraida vitse-ministr Qazaqstannyń «Doing Business» reitinginde 3 satyǵa kóterilip, álemniń 190 eliniń arasynda biznes júrgizýdegi TOP-25 memlekettiń qataryna qosylǵandyǵyn eske saldy.
«Bul jyldan-jylǵa biznesti damytý úshin qolaily jaǵdai jasaýǵa baǵyttalǵan úkimettik sharalar utymdylyǵynyń naqty kórsetkishi», - dedi Jasulan Mádiev.
Sonymen qatar ol shaǵyn jáne orta biznes óndiretin ónimderdiń kólemi de artyp kele jatqandyǵyna nazar aýdartty.
«2019 jyldyń qańtar-maýsymynda shaǵyn jáne orta kásipkerlik sýbektileri óndirgen ónim kólemi 12,7 trln teńgeni qurady jáne 2018 jyldyń tiisti kezeńimen salystyrǵanda 10,8 paiyzǵa ósti. Eger jyldar boiynsha nátijelerdi salystyrar bolsaq, onda 2018 jyly 26,5 trln teńgeniń ónimi shyǵarylǵan edi. Bul 2015 jyldyń kórsetkishinen 70 paiyzǵa kóp», - dedi vitse-ministr.
