Foto: Tengrinews.kz/Turar Qazanǵapov, elements.envato.com
Senat depýtattary "Qazaqstannyń keibir zańnamalyq aktilerine "Azamattarǵa arnalǵan úkimet" memlekettik korporatsiiasy, "Astana Hab" halyqaralyq tehnologiialyq parki jáne daktiloskopiialyq tirkeý máseleleri boiynsha ózgerister men tolyqtyrýlar engizý týraly" zańdy ekinshi oqylymda maquldady, - dep habarlaidy Massaget.kz portaly.
"Zańmen engizilgen mańyzdy jańashyldyqtyń biri – daktiloskopiialyq tirkeý týraly erejeler. Mysaly, "Daktiloskopiialyq jáne genomdyq tirkeý týraly" 2016 jylǵy 30 jeltoqsandaǵy zańnyń 2-taraýynda Qazaqstan azamatynyń pasportyn nemese jeke kýáligin alý úshin alǵash ret júgingen, sondai-aq buryn daktiloskopiialyq tirkeýden ótpegen Qazaqstan azamattary ony qalpyna keltirgen, aýystyrǵan jaǵdaida Qazaqstan azamattaryn mindetti daktiloskopiialyq tirkeý týraly normalar belgilengen bolatyn. "Daktiloskopiialyq jáne genomdyq tirkeý týraly" zańnyń 39-babymen 2-taraýdyń qoldanysy 2024 jylǵy 1 qańtarǵa deiin toqtatylǵan", - dep jazylǵan zańnyń qorytyndysynda.
Endi qazaqstandyqtar saýsaq izderin tapsyrýǵa mindettelmeidi. Sebebi, zańdaǵy mundai norma alynyp tastalǵan.
Zańda Qazaqstan azamattaryna qatysty joǵaryda kórsetilgen erejeler alynyp tastalady jáne Qazaqstan azamattary úshin olardyń kelisimimen ǵana erikti daktiloskopiialyq tirkeý engiziledi. Qazaqstan azamaty úshin mindetti daktiloskopiialyq tirkeý teńizshiniń jeke kýáligin alǵan jaǵdaida ǵana saqtalady.
"Daktiloskopiialyq jáne genomdyq tirkeý týraly" zańda belgilengen jaǵdailarda 16 jasqa tolǵan sheteldikter men azamattyǵy joq adamdar úshin mindetti daktiloskopiialyq tirkeý engiziledi.
Sheteldikter men azamattyǵy joq adamdar úshin jeke sáikestendirý nómirin alýǵa Qazaqstan aýmaǵyndaǵy tirkeýshi organdarǵa jeke óziniń júginý talaby engiziledi. Buryn olar muny basqa adamdarǵa berilgen senimhat negizinde naqty ornalasqan jeri boiynsha jasai alatyn", - dep jazylǵan zańnyń qorytysynda.
Daktiloskopiialyq tirkeýge qatysty erejeler 2024 jylǵy 1 qańtardan bastap kúshine enedi. Depýtattar zań jobasyn ekinshi oqylymda maquldady.
