Qazaqstanda biznestiń qyzmetine zańsyz aralasý áreketterine jaýapkershilik kúsheitiledi. Bul týraly Senat Tóraǵasy Maýlen Áshimbaev málim etti, dep habarlaidy "Ult aqparat".
«Búgingi talqylaý qorytyndysy boiynsha senatorlar kásipkerler qyzmetine aralasqany úshin laýazym ielerine jaýapkershilikti kúsheitýge baǵyttalǵan sharalardy usyndy. Sonymen qatar, bul máseleni birqatar áriptester de kótergen bolatyn. Qazaqstan Respýblikasy kásipkerleriniń quqyqtaryn qorǵaý jónindegi ýákili Rýstam Júrsinov bul máselege qatysty erekshe toqtaldy. Ákimshilik quqyq buzýshylyq týraly kodekske jáne Qylmystyq kodekske birqatar ózgerister engizý qarastyrylyp otyr», - dedi M. Áshimbaev Qazaqstanda shaǵyn jáne orta kásipkerlikti damytý salasyndaǵy memlekettik saiasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Onyń aitýynsha, biznestiń qyzmetine zańsyz aralasý, tekserý tártibin buzý, reiderlik siiaqty jaǵdailarǵa depýtattar zańdy túrde jaýapkershilikti kúsheitýdi qoldap otyr.
«El Prezidenti atap ótkendei, kásipkerlik qyzmetke zańsyz kedergi keltirý memleketke qarsy óte aýyr qylmys retinde baǵalaýyny kerek. Memleket basshysynyń osy nusqaýyn zańnamaǵa birqatar ózgeristermen júzegege asyrýǵa bolady. Barlyq jaýapty memorgandar tyńǵylyqty pysyqtaýy kerek. Senatorlar bul baǵyttaǵy jumysqa daiyn», - dedi Máýlen Áshimbaev.
